Төрийн албан хаагч тэтгэвэр тогтоолгохдоо ажилласан жилтэйгээ харгалзан 36 хүртэл сарын үндсэн цалинтайгаа тэнцэх хэмжээний тэтгэмж авдаг. Энэ нь хувийн хэвшилд ажилладаг хүмүүсээс давуу эрх эдэлж байна гэсэн шүүмжлэл үе үе өрнөдөг. Мөн төрийн алба дотроо олгодог тэтгэмжийн хэмжээ янз бүр байгааг ч тэгш бус гэдэг хүмүүс ч бий. Тэгвэл ийнхүү тэтгэмж олгодог нь Үндсэн хууль зөрчсөн гэж үзэж, нэр бүхий иргэн Үндсэн хуулийн цэцэд мэдээлэл гаргасны дагуу Цэц уг маргааныг хэлэлцэх хугацаагаа товлосноо мэдээлжээ
Нэр бүхий иргэн Төрийн албаны тухай хуулийн 60 дугаар зүйлийн 60.1 дэх хэсэгт “... төрийн албан хаагч өндөр насны тэтгэвэр тогтоолгох үндэслэлээр чөлөөлөгдсөн бол үндсэн цалингийн дунджаас ажилласан хугацааг нь үндэслэн тооцож нэг удаагийн буцалтгүй тусламжийг олгоно. ...” гэж заасан нь Монгол Улсын Үндсэн хуулийн Арван дөрөвдүгээр зүйлийн 1 дэх хэсэгт “Монгол Улсад хууль ёсоор оршин суугаа хүн бүр хууль, шүүхийн өмнө эрх тэгш байна.” гэснийг зөрчсөн эсэх асуудлаар мэдээлэл гаргасан.
Уг мэдээллийн дагуу үүсгэсэн маргааныг хянан хэлэлцэх Монгол Улсын Үндсэн хуулийн цэцийн дунд суудлын хуралдааныг 2025 оны 12 дугаар сарын 03-ны өдрийн 9.30 цагаас Үндсэн хуулийн цэцийн хуралдааны танхимд нээлттэй хийхээр товлолоо.
Сэтгэгдэл (0)
Сэтгэгдэл бичигдээгүй байна