ХУРАНДАА З.ТӨРМАНДАХЫГ СУЛЛАЖЭЭ. ГЭХДЭЭ...?

Ухаа худаг тойрсон асуудал улам л эрчимжиж байх шиг. УИХ-аар удахгүй энэ асуудлыг оруулна гэдгээ Хууль зүй, дотоод хэргийн сайд мэдэгдсэн. 

Ерөнхий сайд Л.Оюун-Эрдэнэ “Өдрийн сонин”-ы өчигдрийн дугаарт сэтгүүлч Э.Энэрэлд өгсөн ярилцлагадаа “MCS” гэдэг компанитай санал зөрөөд байгаа зүйл юу ч байхгүй. Ганцхан стратегийн орд тойрсон асуудал л байна. Бүхэлдээ хувийн хэвшилд жам ёсны бизнесийн эрүүл орчин, зах зээлийн чөлөөт өрсөлдөөн, хууль тэгш үйлчилдэг эрхзүйн орчин хэрэгтэй. Тэрнээс нэг хэсэг нь хуулиас дээгүүр, нөгөө хэсэг нь төрийн хүнд суртлын дор. Зарим нь төрөөс илүү мэдээлэлтэй, нөгөө хэсэг нь хүсээд ч мэдээлэл авч чадахгүй бол жам ёсны бизнесийн эрүүл өрсөлдөөн үүсэхгүй шүү дээ.” гэж ярьжээ. 

Засгийн газрын тэмдэглэлээр Ухаа худагийг Энержи ресурст өгсөн асуудал тун удахгүй нэг талдаа гарч шийдэгдэх биз ээ.

Ерөнхий сайд MCS компанийн хууль хамгаалалтын газар төрөөс давсан гүйцэтгэх ажиллагаа хийсэн гэдэг асуудал шалгагдаж байгааг хэлэхдээ зөвхөн нэг байгууллага ч биш ийм асуудлууд хэд хэд гарсан гэсэн нь  ноцтой. 

Прокурорын зөвшөөрөлгүй хэн ч хуулиас давж, иргэдийн хувийн мэдээлэлд халдах, тусгай төхөөрөмж ашиглан гүйцэтгэх ажиллагаа явуулах эрхгүй. Тиймээс цэгцлэх нь зүйтэй. Ийм байдал хэтэрвэл цаашид бие даасан цагдаа, армитай болох хүртлээ өргөжиж, эрх зүйт төрийн хэм хэмжээг давдаг муу жишээ олон бий. Хууль хяналтын байгууллагад ажиллаж байсан дарга нар хувийн компанид ажиллах нь хувь хүний сонголт боловч цаашид анхаарах л ёстой асуудал. Төр тэднийг анхаараагүй орхичихдог нь бас алдаа гэж боддог гэжээ. 

Тусгай төхөөрөмжийн асуудал цадигаа алдсан гэж хүмүүс яриад л байдгийг нэг тийш нь цэгцлэхгүй бол дургүйгээ хүрэхээр нэг нь юу ч юм гаргаж ирээд хүний эрхэд халдаад байдаг зүйл цааш улам л цэцэглэн хөгжих магадлалтай тул энэ нь ч зөв.

Яг энэ яриатай зэрэгцэн өчигдөр /2025.03.10/ Дүүргийн Эрүү, Иргэний хялбар ажиллагааны шүүх тусгай төхөөрөмж ашиглан гүйцэтгэх ажиллагаа явуулсан хэрэгт шалгагдаж буй, хурандаа З.Төрмандахын цагдан хориог өөрчилсөн талаараа мэдээлэв.

Хоёр ч өмгөөлөгч нь эрүүл мэндийн шалтгааны улмаас цагдан хорих арга хэмжээг өөрчлүүлэх хүсэлт гаргасныг шүүх хүлээн авсан байна. Эрүүл мэнд бусдаас чухал учир аргагүй ч шүүхээс гаргасан мэдээлэлд З.Төрмандахын өвчнийг нэгбүрчлэн дурдсан нь хачирхам.

Нэгэнт олон нийтэд ил болсон мэдээлэл, тэгээд ч шүүхийн байгууллага нь түүнээ ил тавьсан учир энд дурдъя. “... Элэг шилжүүлэн суулгах мэс заслын дараах хүндрэл, чихрийн шижин хэв шинж 2 оноштойгоор Цагдан хорих 461 дүгээр хаалттай ангийн нэгдсэн эмнэлгээс Улсын Нэгдүгээр эмнэлгийн хяналтад мэс заслын хагалгаанд орох заалттайгаар шилжсэн нөхцөл байдлуудыг харгалзан яллагдагч З. Төрмандахад авсан цагдан хорих таслан сэргийлэх арга хэмжээг өөрчилж, прокурорын саналыг харгалзан Монгол Улсын хилээр гарахыг хязгаарлах, тодорхой  хүнтэй уулзахыг хориглох хязгаарлалт тогтоох таслан сэргийлэх арга хэмжээ авч шийдвэрлэв.” гэсэн байх юм.

Эрүүл мэндийн хувьд асуудал байгаа нь эргэлзээ төрүүлэхгүйгээр мэдээнээс харагдаж байна. Гэхдээ хэрэгт сэрдэгдсэн ч бай хүний өвчний мэдээлэл ингээд шууд ил байх нь зөв эсэхийг бүү мэд. Хүний эмзэг нууц мэдээлэл гэдэгт ял эдэлсэн мэдээллийг хүртэл оруулна гээд л саяхан сэтгүүлч бүсгүйд ял өгөөд байсан уу, үгүй юу. Гэтэл өвчин бүрийг шууд ингэж дурдах нь хэр зохистой юм бол. Цаашдаа шүүх цагдан хорих таслан сэргийлэх арга хэмжээг өөрчилсөн хүн болгоны өвчнөө ингэж дэлгэрэнгүй дурдах уу, тэр нь хуультай харшлах уу, үгүй юу гэдэг асуудал гарч ирнэ. 

Ямартай ч Монголын цагдаагийн шилдэг мөрдөгчдийн нэг явсан хурандаа З.Төрмандахыг гадуур шалгах болжээ. Тэр буруутай эсэхийг удахгүй шүүх дэнслэх биз ээ.