Монгол Улсын Үндсэн хуулийн цэцийн Их суудлын хуралдаан өнөөдөр /2024.11.08/ боллоо.
Хуралдаанаар Үндсэн хуулийн цэцэд маргаан хянан шийдвэрлэх ажиллагааны тухай хуулийн 15 дугаар зүйлийн 4 дэх хэсэгт “Цэц зөвхөн Үндсэн хууль хүчин төгөлдөр болж үйлчилсэн 1992 оны 2 дугаар сарын 12-ны өдрөөс хойш гарсан хууль тогтоомж болон албан тушаалтны үйл ажиллагаатай холбогдсон маргааныг хянан шийдвэрлэнэ.” гэж заасан нь Монгол Улсын Үндсэн хуулийн холбогдох заалтыг зөрчсөн эсэх тухай маргааныг дахин хянаж, эцэслэн шийдвэрлэжээ.
Хуралдаанаас маргааны зүйл болоод байгаа дээрх заалт Монгол Улсын Үндсэн хуулийн Жаран дөрөвдүгээр зүйлийн 1 дэх хэсгийн “Монгол Улсын Үндсэн хуулийн цэц бол Үндсэн хуулийн биелэлтэд дээд хяналт тавих, түүний заалтыг зөрчсөн тухай дүгнэлт гаргах, маргааныг магадлан шийдвэрлэх бүрэн эрх бүхий байгууллага, Үндсэн хуулийг чандлан сахиулах баталгаа мөн.”, Далдугаар зүйлийн 1 дэх хэсгийн “Үндсэн хуульд хууль, зарлиг, төрийн байгууллагын бусад шийдвэр, нийт байгууллага, иргэний үйл ажиллагаа бүрнээ нийцсэн байвал зохино.” гэж заасныг зөрчсөн байна гэж үзэж, тус хэсгийг хүчингүй болгож эцэслэн шийдвэрлэсэн байна. Ингэснээр Үндсэн хуулийн цэц 1992 оноос өмнөх хууль тогтоомж, албан тушаалтны үйл ажиллагаатай холбогдсон маргааныг хянан шийдвэрлэх боломжтой болж байна.
Мөн Монгол Улсын Их Хурлын 2020 оны 30 дугаар тогтоолыг хүчингүй болсонд тооцлоо. Дашрамд дурдахад УИХ-ын 2020 оны 30 дугаар тогтоолоор яг өнөөдөр /2024.11.08/ Үндсэн хуулийн цэцийн Их суудлын өнөөдрийн /2024.11.08/ хуралдааны шийдвэртэй яг ижил шийдвэр гаргасан Цэцийн 2020 оны 4 дүгээр сарын 15-ны өдрийн 01 дүгнэлтийг хүлээн зөвшөөрөх боломжгүй гэж үзсэн байдаг.
Сэтгэгдэл (0)
Сэтгэгдэл бичигдээгүй байна