Аргентины шигшээ багийнхан Америкийн цомд түрүүлснийхээ дараагаар баяраа тэмдэглэхдээ яагаад ч юм Францын хөлбөмбөгчдийг доромжилсон үгс хашхиралдан, дуулсан бичлэг сошиал ертөнцөөр тархсан. Уг нь Америкийн цомд Францын шигшээгийн хөлбөмбөгчид, тэдний гэр бүлийнхэн ямар ч хамааралгүй байлтай. Гэвч Аргентины шигшээгийнхэн ямар нэгэн байдлаар хамаатуулж хашхиралдан дуулцгаасан юм.
“Францын төлөө тоглодог ч гэлээ тэд бүгдээрээ Анголоос гаралтай. Ээж нь Нигерийнх, аав нар нь Камеруных. Тэгтэл үнэмлэх дээр нь Франц гээд биччихсэн ч байх шиг” гэх мэт үгс тэрхүү хашхиралдан баясах дуунд нь гарна. Мөн Францын шигшээгийнхэн трансжендерүүдтэй энгэр зөрүүлдэг гэх үг ч бий.
Ийнхүү дуулж баясан буй бичлэгээ Аргентины шигшээ болон Английн “Челси”-гийн хагас хамгаалагч Энцо Фернандес шууд цацсанаа дараа нь болохгүй зүйл хийснээ мэдэрсэн үү салгасан байна. Үүний дараагаар Францын Хөлбөмбөгийн Холбоо эгдүүцэж буйгаа илэрхийлсэн. Мөн Африкийн зарим улсын Хөлбөмбөгийн Холбоод ч тэгтлээ баярлаагүй нь лавтай байгаа.
Энцо Фернандесийн хийсэн бичлэг, шигшээ багийнхныхаа гаргасан үйлдэл, хашхирсан үгсийн талаар Английн "Ливерпүүл"-ийн хагас хамгаалагч Алексис Макаллистер ийн өгүүлжээ.
“Юу хэлж, ярьж буйгаа анзаарч, болгоомжтой байхгүй бол Европ шиг их эмзэг мэдрэмтгий газар хэцүү шүү. Аргентинчууд бол арьс өнгөөр ялгаварлан доромжлогчид биш. Бид арьс өнгөөр ялгаварлан гадуурхаж, доромжилж яриад дасчихсан хүмүүс биш. Тийм ээ, энэ бол их чухал сэдэв гэдэг нь үнэн.
Энцо тайлбар хэлээд, уучлалтаа гуйчихсан. Одоо дахиад нэмж яриад байх зүйл үгүй гэж бодож байна. Бид Энцог мэднэ. Хэзээ ч муу санаж, хэн нэгнийг тавлах гэж тэгж хашхирах залуу биш. Тийм хүн биш. Арьс өнгөөр ялгаварлагч биш.
Их болгоомжтой байх ёстой гэж би түрүүн хэлсэн. Гэхдээ хамгийн гол нь Энцо уучлалтаа гуйсан нь гэж бодож байна. Уучлалт гуйсныг нь ойлгож, үнэлэх хэрэгтэй” хэмээн Алексис Макаллистер өгүүлсэн байна.
Францын шигшээ багийн ахлагч асан хаалгач Уго Льорис энэ явдлын талаар бодлоо хэлэхдээ “Том тэмцээнд түрүүлснийхээ дараагаар хүн баярлан хөөрч болно. Гэхдээ баярлах тусмаа үг үйлдлээ илүү сайн хянаж, хариуцлагатай болох ёстой. Тэднийг хэт хөөрсөндөө алдаа гаргачихлаа л гэж найдъя. Үүнээсээ сургамж аваад, дахиад алдахгүй байх гэж найдъя” гэжээ.
Аргентинд болсон явдлыг хэрхэн хүлээж авсан нь бас сонирхолтой. Тус улсын Спортын хэрэг эрхэлсэн дэд сайд Хулио Гарро “Энэ явдлын гол бурууг шигшээ багийн ахлагч үүрэх ёстой. Мөн Аргентины Хөлбөмбөгийн Холбооны тэргүүн үүнд мөн буруутай” гэжээ. Ингэж мэдэгдснийх нь дараахан түүнийг Аргентины Ерөнхийлөгч Хавьер Милей ажлаас нь халсан байна. Халсан шалтгаанаа тайлбарлахдаа Дэлхийн аварга болсон мөн Америк тивийн аварга болсон шигшээ багийнханд юу хэлж ярихыг нь хэн ч заах ёсгүй гэж Хавьер Милей хэлсэн аж.
Үүний дараагаар Ерөнхийлөгчөө дэмжиж, дэд-ерөнхийлөгч эмэгтэй Викториа Вильярруэль ч үгээ хэлээд амжлаа. “Хүлээн зөвшөөрөхийг хүсэхгүй байгаа үнэнийг хэллээ гэж колоничлогч ямар ч улс биднийг айлгаж чадахгүй. Хоёр нүүртэй новшнууд биднийг буруутгах ёсгүй. Энцо, бид чамтай хамт шүү! Месси, хийсэн бүхэнд чинь баярладаг шүү! Аргентинчууд хэзээд тэргүүнээ өндөр өргөж явах учиртай. Аргентин мандтугай!” хэмээн дэд-ерөнхийлөгч эмэгтэй мэдэгджээ.
Аргентинд яагаад хар арьстнууд байдаггүй вэ? гэх асуултыг энэ явдлын дараагаар олон хүн асуужээ. Үүнд түүхчид, тоймчид янз бүрээр хариулсан байна. Түүхэнд тэмдэглэн үлдсэнээр бол 200 жилийн өмнө Аргентины одоогийн нийслэл Буэнос-Айресийн хүн амын 1/3 нь хар арьстнууд байсан аж. Гурван хүн тутмын нэг нь хар арьстан байсан гэсэн үг шүү дээ!
Тэр олон хар арьстнууд хаашаа алга болсон талаар түүхчид тайлбарлахдаа тахалд нэрвэгдсэн гэх нь бий. Мөн тусгаар тогтнолын төлөөх дайны хөлд ихэнх нь үрэгдсэн ч гэдэг. Гэхдээ хамгийн логикийн дагуу хариулт нь XIX зууны сүүлчээр Европоос ялангуяа Италиас олон сая цагаачид Аргентинд шилжин суурьшсантай холбоотой байж болох аж. Дэлхийн Хоёрдугаар дайны дараагаар ч мөн адил олон итали иргэд Аргентинд цагаачлан гарчээ. Тийм ч учраас Аргентинд итали аялгатай испани хэлээр ярьдаг хүмүүс олон байдаг. Түүхчид товчхон тайлбарлахдаа “Аргентин хар арьст ажиллах хүч биш харин цагаан арьст ажиллах хүчийг илүү таашаан хүлээн авсан юм” гэж тэмдэглэсэн нь цөөнгүй. Үүнийг дагаад өнөөх цагаан арьст ажиллах хүч эргээд хар арьст ажиллах хүчийг үгүйсгэх, гадуурхах, доромжлох хандлага их гарч байсан нь одоо тэдний үр садад ч дамжин үлдэн хоцорсон байж болох ажээ.
.
Р.Гэгээ
Сэтгэгдэл (0)
Сэтгэгдэл бичигдээгүй байна