РАЙС ЦЭВЭР ШАР АЙРАГ АНХ УДААГАА УУЖ ҮЗНЭ ГЭЖ АМЛАВ

Евро2024-ийн финалын тоглолт зарим хөлбөмбөгчийн хувьд шар айрагны амтыг анх мэдэрснээр өндөрлөж магадгүй бололтой.

Финалд Испани – Англи шалгараад байгаа. Тоглолт УБ цагаар бол энэ сарын 15-ны 03:00-д эхэлнэ. Английн шигшээ болон “Арсенал”-ын тулгуурын хагас хамгаалагч Деклан Райс Евро2020-ийн финалын өмнө “Хэрвээ аварга болвол анх удаагаа шар айраг ууна. Одоо хүртэл би ууж үзээгүй болохоор амсаад буцаагаад гаргачихаж ч магадгүй” хэмээн ярьж байсан юм. Гэвч тэрхүү финалд Италийн шигшээд пенальтиар хожигдсон.

Гурван жилийн дараагаар дахин финалд шалгараад Деклан Райс шар айраг анх ууж үзэх тухайгаа дахин ярьжээ. “Өнгөрсөн финалын өмнө би ярьж байснаа саналгүй яахав. Түүнээс хойш шар айраг амсаж үзсэн үү гэвэл үзсэн. Гэхдээ лимоны амттайг амссан юм. Тиймээс одоо бид финалд хожоод аварга болвол би ямар нэгэн жимсний амт оруулаагүй цэвэр шар айраг анх удаагаа ууж үзнэ ээ. Гэхдээ уухдаа үнэрээс нь болоод хамраа чимхэх байх даа. Их онцгүй үнэртэй юм шиг байсан” хэмээн Райс өгүүлжээ. Ийнхүү Райс үнэрийг нь мэддэг ч цэвэр амтыг нь үзээгүй шар айрагны амтыг анх удаагаа мэдрэх эсэхийг финалын тоглолт шийдэхээр болж байна.

Шар айрагны тухай яриаг хойш тавиад финалын тоглолтын талаар ярихдаа “Бид хожихыг маш их хүсч байна. Мэдээж, маш хэцүү тоглолт болно. Гэхдээ өнгөрсөн Евро-г бодвол бид хожихын тулд юу хийх ёстойг мэднэ. Яаж тоглолтыг хяналтандаа байлгахаа гадарлана. Энэ финалд яавал хожиж болохыг ч мэдэж байгаа. Энэ бол өмнөхөөс авсан сургамж, одоогийн давуу тал юм.

Европын АШТ-ийн финал гэдэг маш чухал. Гэхдээ болох зүйл болоод л өнгөрдөг. Бид түүхийн шинэ хуудас нээж болно гэдгээ л бодож явна” хэмээн Деклан Райс өгүүлсэн байна.