МОРАТА: ИСПАНИД ХЭНИЙГ Ч, ЮУГ Ч ХҮНДЭЛДЭГГҮЙ

Евро2024-д Испанийн шигшээгийн ахлагчаар довтлогч Альваро Мората ирсэн. Гэхдээ шигшээ багийн ахлагчийгаа испаничууд гоочилж, чичлэх нь элбэг. Тухайлбал, Евро2020-ийн үеэр Моратаг бөмбөг авах тоолонд дургүйцэн бүүлж байсан бол Бразилын шигшээтэй тоглоход дооглон инээлдэцгээсэн юм.

Энэ тэмцээн дээр ч гэсэн Альваро Моратаг ад үзэн, дургүйцлээ илэрхийлэгчид бишгүй иржээ. Шөвгийн наймд Германыг хожсоны дараагаар Мората баярын нулимс унагасан атал зарим фанатууд “Шар хуудас авчихлаа гэж матрын нулимс унагалаа” хэмээн гоочилжээ.

Тиймээс ч 31 настай Мората энэ тэмцээний дараагаар шигшээ багтаа дахин тоглохгүй байх шийдвэр гаргаж ч магадгүй болжээ.

“Шигшээдээ тоглож буй сүүлчийн тэмцээн маань энэ байж магадгүй. Гэхдээ энэ талаар нэг их яримааргүй байна. Ямар ч байсан тийм магадлал бол бий.

Ер нь миний хувьд эх орондоо аз жаргалтай байхад хэцүү байдаг. Испаниас өөр улсад хүмүүс намайг хүндэлдэг болохоор аз жаргал мэдэрдэг. Испанид хэнийг ч, юуг ч хүндэлдэггүй юм.

Сая л гэхэд, намайг шар хуудас авсандаа уйллаа гэж гоочиллоо. Юу ч яриад байдаг юм! Миний ахлаж ирсэн шигшээ баг маань шөвгийн дөрөвт шалгарахад баярласандаа л би уйлсан. Би лав хэн нэгнийг уйллаа гээж гоочилж хэзээ ч чадахгүй.

Магадгүй миний шигшээдээ тоглож буй сүүлчийн тэмцээн байж мэдэх учраас таашаал авахыг маш их хүсч байна. Намайг одоо үзэн ядаж, гоочилж буй хүмүүс ирээдүйд санан үгүйлж ч мэднэ. Өдөр ирэх тусам шигшээ багаасаа явах өдөр ойртсоор байгаа учраас нулимс маань ойрхон болжээ” хэмээн Альваро Мората өгүүлсэн байна.

Испанийн шигшээ багийн ахлах дасгалжуулагч Луис де ла Фүэнтэ ахлагчаа дэмжин “Моратагийн хэлж буй үнэн шүү дээ. Ийм од тоглогчид тэгж хандана гэдэг шударга бус байхгүй юу. Мората бол багийнхандаа үлгэр дуурайлалтай сайн залуу. Тиймээс ч би түүнийг хөлбөмбөгчийн хувьд ч, хүнийх нь хувьд ч дэмждэг. Мората бол манай багийн ахлагч. Багийнхандаа хүлээн зөвшөөрөгдсөн хүн” гэжээ.

Энэ зун Мората “Атлетико Мадрид”-аас явах магадлал маш өндөр болсон. Уг нь “Атлетико”-той хамт цом өргөхийг хамгаас их хүсч буйгаа саяхан л ярьж байсан юм. “Тийм ээ, би “Атлетико”-той хамт цом өргөхийг маш их хүсч буйгаа илэрхийлсэн. Гэвч дараа нь үлдэх хэрэг байна уу, үгүй юу гэдгээ бодоход хүрсэн. Хөлбөмбөгт юуг ч баттай хэлж болдоггүй шүү дээ. Зүрх сэтгэл минь эндээ үлдэхсэн гэж хүснэ. Гэвч Испанид надад үнэндээ хэцүү байх юм. Намайг хүмүүс өөрийгөө золиос болгон харагдуулж, өрөвдүүлэх гэлээ гэж шүүмжилдэг. Харин би бол зүгээр л байгаагаасаа таашаал авч, тэмцээн маань аль болох амжилттай сайн дуусаасай л гэж хүсч яваа. Учир нь энэ тэмцээн сүүлчийнх байж магадгүй” хэмээн өгүүлжээ.

.

Р.Гэгээ