ЛАМИН ЯМАЛЬ БУЮУ НАЙДВАРСАЙХАН

Евро2024-ийг чимж буй 16 настай испани тоглогч Ламин Ямалийн нэрийн талаар яриа өрнүүлье. Эхлээд Германы шигшээтэй тоглоход Дани Ольмод өгсөн гоолын дамжуулалтыг нь бахдахгүй байхын аргагүй. Гэвч дасгалжуулагч Луис де ла Фүэнтэ түүнийг харьцангуй эрт суулгана лээ. Эрт суулгаж буйд эгдүүцэж буйгаа ч Ламин Ямаль байгаа байдлаараа илэрхийлээд амжсан.

Ламин Ямалийн аав нь Марокко, ээж Экваторын Гвиней. Харин өөрөө бол Испанид төрж өссөн юм. Испанид хүүхдүүдэд залгаа нэр өгөхийг зөвшөөрдөг. Манайхаар бол Бат-Эрдэнэ, Мөнх-Оргил гэдэг шиг. Тиймээс аав ээж нь ярилцаж байгаад хүүдээ Ламин Ямаль гэх нэр хайрлажээ.
Ламин гэдэг нь арабаар Аль-Амин буюу нэр төртэй найдвартай гэсэн утгыг илэрхийлдэг гэнэ. Харин Ямаль гэдэг нь Жамал гэх нэрний шилжсэн хэлбэр бөгөөд гоо сайхан гэх утга илэрхийлнэ. Тэгэхээр монголоор бол Найдварсайхан гэх утгатай нэр болж байна. Энэ бол түүний нэр. Овог нь биш. Овог нь бол Насрауи Эбана ажээ. Бүтэн нэр нь ингэхээр Ламин Ямаль Насрауи Эбана болж байна.
Ламин Ямаль Европын АШТ-ий түүхэн дэх хамгийн залуу тоглогч болсон. 16 нас 11 сар 3 хоногтойдоо Евро-гийн талбайд гарснаар нэрээ түүхэнд мөнхөллөө. Өмнө нь Евро2020-д Польшийн Кацпер Козловски 17 нас 8 сар 1 хоногтойдоо Испанийн эсрэг талбайд гарснаар Евро-гийн түүхэн дэх хамгийн залуу тоглогчоор нэрлэгдэж байсан юм.
Ламин Ямалийн гэр бүлийг эмээ нь Испанид авчирсан гэдэг. Ямалийн аав нь Испанид очоод нэг хэсэг хэрэг төвөгт орооцолдож, бужигнуулсан ч дараа нь томоожсон байна. Ээж нь түргэн хоолны сүлжээ газарт ажиллаж байхдаа хөлбөмбөгт дурласан, өөрөө сонирхогчдын лигт тоглож явсан Иносенте Диастай танилцжээ. Иносенте Диас л хүүгийн хөлбөмбөгийн авъяасыг анхлан олж харснаар “Ла Торрета” хөлбөмбөгийн сургуульд элсүүлсэн байна. Хүүг “Ла Торретта”-д тоглож буйг “Барселона”-гийн скаут анзааран, ихэд үнэлсэн учир 7 настайд нь академидаа авчээ. Гэвч тэр үед аав ээж нь салж, хүүгийн сэтгэл санаанд хүнд цохилт болсон байна. Аав ээж хоёр нь салахдаа хүүгийнхээ хөлбөмбөгийн ирээдүйд ямар нэг саад хийхгүй гэж тохиролцсон ажээ.
13 настайдаа л Ламин Ямаль 16 хүртэлх насны багт тоглож эхэлсэн байна. Дасгалжуулагчид түүнийг төрөлхийн авъяастай гэж хэлдэг. Хамгийн гол нь хөлбөмбөгийн IQ маш сайтай. Үеийнхнээсээ хавьгүй сайн тоглодог ч гэлээ Ламин Ямаль их зан гаргаж, бардамнаддаггүй, даруухан хүү гэнэ.
Испанийн шигшээ багийн дасгалжуулагч Луис де ла Фүэнтэ “Энэ хүүгийн биед шидэт дохиураар хүрчихсэн юм шиг санагддаг. Бусдаас өөр шүү” хэмээн магтсан байдаг.
Евро2024-ийн үеэр Ламин Ямаль сургуулийнхаа шалгалтад бэлдэн суугаа зургууд сошиал орчинд тархсан. “Физик, хими, математикийн хичээлд би дуртай. Химидээ нэг их сайн биш ч гэлээ их хөгжилтэй, зугаатай санагддаг. Үнэндээ ийм хурдан мэргэжлийн хөлбөмбөгч болчихно гэж төсөөлөөгүй. Хэрвээ өөр ажил хийхэд хүрсэн бол би балрах байсан байх аа. Тэгвэл үргэлжлүүлэн сурна гэдэг бас л чанга шүү дээ...” хэмээн өгүүлсэн байна.
Сэтгүүлчид 16 настай хүүгээс ирээдүйд ямар найз охинтой, ямар гэр бүлтэй болохыг хүсдгийг нь асуухад “Би энэ талаар боддоггүй. Тайван л байхад болно гэж боддог. Яг одоо өөр хэн нэгэнтэй уулзаж учирна гэдэг илүү зүйл шиг санагддаг. Хөлбөмбөгчийн замналдаа л анхаарсан нь дээр. Харин 26 нас хүрээд гэр бүлийн тухай бодож болох юм” хэмээн хариулжээ. Гэвч цуутай хүүг охид хүүхнүүд яаж зүгээр явуулахав. Лифтэнд нэгэн бүсгүй тааралдаад “Надад утасныхаа дугаарыг өгчих. Чи бид хоёрт хоёуланд нь хэрэг болно шүү” гэж хэлсэн. Би эелдгээр татгалзаад дахиад нэг ч үг дуугарч чадаагүй. Тэр үед их эвгүй болсон ч гэлээ одоо бодохоор инээдтэй санагддаг юм” хэмээгээд инээмсэглэжээ.
Хууралт дуртайгаа тайлбарлахдаа “Би хамгаалагчдыг хуурч гарах дуртай. Нэг талдаа сэтгэлзүйн дайн байхгүй юу. Хэрвээ би хамгаалагчийг хуурвал тэр надаас дараа нь айдаг болно. Тэгвэл дараа дараачийн тоглолтдоо улам илүү бүтээлч, илүү итгэлтэй байж, сул талыг нь ашиглаж чадна. Тоглолтын өмнө бичлэг үзэх би дуртай биш. Зүгээр л талбайд гараад хүссэнээрээ тоглодог” хэмээн Ламин Ямаль өгүүлжээ.
.
Р.Гэгээ