​ ФИЛ ФОДЕН: ЭНД САЙН ТОГЛОЖ ЧАДАХГҮЙ БОЛ БИ ПРЕМЬЕР ЛИГИЙН ШИЛДЭГ БИШ ГЭСЭН ҮГ!​

Английн шигшээ шүүмжлүүлэн, шүүмжлүүлэн урагшилсаар, шөвгийн наймд гарч ирээд байна. Одоо тулах өрсөлдөгч нь Швейцарийн шигшээ.

Германы алдарт довтлогч Юрген Клинсманн англичуудыг Швейцарийн түүхэн дэх хамгийн шилдэг багтай тулах гэж буйг нь онцгойлон сануулсан байна лээ. Английн шигшээгийн тоглолт нэг л болж өгөхгүй байгаа тул хожигдох магадлалтай шүү гэсэн утгыг Клинсманн дайж хэлсэн хэрэг.

Хэвлэлүүдийн мэдээлж буйгаар бол Английн шигшээгийн зарим хөлбөмбөгчид урагш шахах, прессинг тавъя гэсэн ч биеийн бэлтгэл, сэтгэлийн тэнхээ тэсвэр дутаж байгаа бололтой. Тэдний нэг нь өнгөрсөн улиралд Премьер лигийн Шилдэг тоглогчоор нэрлэгдсэн Фил Фоден юм. Тэгвэл Фоден Евро2024-д өөрийнхөө дуртай төвдөө бус хариу зүүн жигүүрт тоглож буйдаа тухгүй байгаагаа нуулгүй хэлсэн байна.

“Өнгөрсөн улиралд би төвд тоглож чадна гэдгээ харуулж, олон тоглолтод төвд гарч, олон ч гоол оруулсан. Ер нь би өөрийгөө төвийн тоглогч гэж боддог. Тиймээс Евро2024-ийн байрлалдаа сэтгэл гонсгордуу байгаагаа нуугаад яахав. Английн шигшээдээ хамгийн сайнаараа тоглохыг хүсэвч заримдаа болохгүй юм. Гэхдээ өөдрөг байдлаа хадгалж үлдэж чадах хэрэгтэй. Хэрвээ Евро2024 дээр сайн тоглохгүй бол би Премьер лигийн шилдэг тоглогч биш байжээ л гэсэн үг. Шигшээ багтаа сайн тоглох нь миний гол зорилго байсаар ирсэн.

Жүд Бэллингэм бид хоёрыг хамтдаа тоглож зохицохгүй юм байна гэж хүмүүс ярьдаг. Гэвч би тэгж боддоггүй. Шийдвэрлэх тоглолтуудад бид хоёр хамтарч, сайн тоглож чадна.

Гарет Саутгэйтийн өмнөөс заримдаа харамсах юм. Биднийг хамгаалалтандаа анхаарч тогло гэж тэр огт хэлээгүй юм шүү дээ. Харин ч бэлтгэл дээр прессинг өндөр тавь, илүү шахаж тогло гэдэг. Гэвч талбай дээр гараад хөлбөмбөгчдийн хөдөлгөөн, бодлоос бүх зүйл шалтгаалж, өөрчлөгдөөд байгаа. Хөлбөмбөгчид өөрсдөө хариуцлагаа үүрэх хэрэгтэй” хэмээн Фил Фоден өгүүлсэн байна.