Евро2024-ийн хасагдах шатны тулаан ширүүн өрсөлдөөнтэй өрнөж байна. Английн шигшээ өчигдөр Словакт хожигдох тун дөхлөө. Шүүгчийн сунгасан 6 минутын 5 дахь дээр Жүд Бэллингэм унаж татан гоол оруулснаар тоог тэнцүүлж, нэмэлт хоёр үе рүү тоглолтыг оруулж чадсан.
Харин нэмэлт үеийн эхэнд Харри Кейн гоол оруулснаар Гурван арслан шөвгийн наймд шалгарлаа. Энэ тоглолтын дараагаар хоёр багийн зарим тоглогч, дасгалжуулагчдын дунд маргаан үүсээд амжсан. Тэгвэл юу болсон талаар Словакийн шигшээ багийн ахлах дасгалжуулагч Франческо Кальцона тайлбарласан байна.
“Тоглолтын дараагаар Деклан Райс над руу дөхөж ирээд “Амаа тат, халзан **** минь” хэмээн хашхирсан. Англичуудыг “баг бариад” байна гэж би шүүгчид хэлсэн юм л даа. Энэ л түүний дургүйг хүргэсэн бололтой. Гэхдээ дараа нь Райс надаас уучлалт гуйсан. Тиймээс энэ тал дээр дахиж яриад байх юу байхав. Сэтгэл хөдлөлдөө л түр зуурт автсан хэрэг” хэмээн Кальцона өгүүлжээ.
Жүд Бэллингэмийн тоог тэнцүүлсэн гоолын талаар ямар бодолтой байгааг асуухад “Тоглолт дуусахаас хэдхэн секундын өмнө бид гоол алдлаа. “Реал Мадрид”-д тоглодог хөлбөмбөгч тэр гоолыг хийлээ. Ер нь бол хэдхэн сантиметрийн алдааны л асуудал. Үл ялиг алдаа гаргаж, тоглогчоо алдсаны л шийтгэл юм. Магадгүй бид тухайн агшинд илүү ширүүн, илүү сайн хамгаалж чадах байсан.
Сэтгэл санаа үнэндээ авах юм алга. Гэвч багийнхаа залуусаар бол их бахархлаа. Бараг хожлоо шүү дээ. Дэлхийн хамгийн дээд зэрэглэлийн багийг хожоод, дараагийн шатанд гарчих дөхлөө. Их ч хичээлээ. Гэвч эцсийн дүндээ чадсангүй. Нэмэлт үеийн хагасыг нь бид өрсөлдөгчийнхөө бүсэд өнгөрүүллээ. Тэд биднээс айж байлаа. Би тоглогчдоосоо хэнийг ч буруутгагүй. Нэг ч нэр хэлэхгүй. Зүгээр л тухайн агшинд бид илүү ширүүн тоглох л ёстой байж гэж бодож байна. Мөн шүүлт таалагдсангүй. Гэвч шүүгчээс болж хожигдлоо гэх гээд байгаа юм биш ээ. Бид маш тэнцвэртэй сайн тоглосныг статистик гэрчлээд өгнө. Эцсийн мөчид бидний мөрөөдөл нуран уналаа. Одоо үүнтэйгээ эвлэрэх л үлджээ” хэмээн Кальцона өгүүлсэн байна.
Сэтгэгдэл (0)
Сэтгэгдэл бичигдээгүй байна