ДАРХЛАА ДЭМЖИГЧ "ХӨМҮҮЛ" БРЭНД

“НЭГ СУУРИН-НЭГ БҮТЭЭГДЭХҮҮН” аяны хүрээнд 21 аймгийн онцлох бүтээгдэхүүний нэгээр нэрлэгдсэн “Өнөд өвлөх урлахуй” ХХК-ийн “Хөмүүл” брэндийн талаар танилцуулж байна. Тус компанийн эрүүл ахуйч Сандуйжавын Оюунбилэгээс цөөн асуултад хариулт авлаа.

-Компанийнхаа талаар эхлээд танилцуулах уу?

-Манайх бол Өмнөговь аймгийн “Өнөд өвлөх урлахуй” ХХК “Далан булаг” хүнсний үйлдвэр. Арван тав, зургаан жилийн өмнөөс усны үйлдвэр маань ажиллаж эхэлсэн. Мөн орон нутгийн түүхий эд болсон хөмүүлээ ашиглаж, хүний эрүүл мэндэд тустай эко бүтээгдэхүүн хийдэг. Говь нутаг маань  тэмээгээрээ алдартай. Тэмээний шимийн архи орон нутгийн бүтээгдэхүүнээ бэлгийн савлагаатай гаргадаг. Үйлдвэрийн бас нэг онцлог нь махны үйлдвэртэй. Махаа орон нутгийнхаа малчдаас авч ангилж савлаж, уул уурхай, орон нутгийнхаа иргэдийн нөөцийн махыг бэлтгэж ажилладаг. Бууз, баншны цехтэй, ер нь хүнсний бүхий л гол салбарын бүтээгдэхүүний үйлдвэрлэл явуулдаг.   

-Хэр олон ажилтантай вэ?

-Усны, махны үйлдвэр, түгээлт борлуулалт, захиргаа нийлээд 40 гаруй хүн ажилладаг.  

-"Хөмүүл" брэндээ хэрхэн бэлтгэдэг вэ? Онцлог нь юу байна?

-Хөмүүлийг байгалиас түүж, ямар ч хольц хийлгүй зүгээр даршлах аргаар савладаг. Хөмүүлийн шүүс, хөмүүлийн сорс гэж мөн шүүс болон хатаамал байдлаар бүтээгдэхүүн гаргасан. “Хөмүүл брэнд”-ээ эрдэм шинжилгээний ажил болгож, 2018 онд Оюуны өмчийн гэрчилгээ авч, бүртгүүлсэн. Хүний эрүүл мэндэд асар тустай, байгалийн цэвэр бүтээгдэхүүн юм.

-Хүний эрүүл мэндэд яг ямар тустай вэ?

-Дархлаа дэмжинэ. Даавар гармон, бамбай булчирхайд сайн, холестриний хэмжээг бууруулдаг. Төв суурин газарт амьдардаг хүмүүст их тохиолддог чийг бамаас хамгаалдаг. Цус төлжүүлж, биеийн эсэргүүцэл сайжруулж, цус харвах, уураг тархины эд эс үхэх, бүдүүн гэдэс, түрүү булчирхай, амны хөндийн хорт хавдраас урьдчилан сэргийлдэг. Харшлын эсрэг үйлчилгээтэй.

-Сүүлний тос жижиг савлагаатай харагдана?

-Манайх чөмөгний тос, сүүлний тос мөн үйлдвэрлэдэг. Сүүлний тосны тухайд 50 граммаар савласан. Ахмадууд рашаан сувилалд явахдаа, мөн иллэг барианд зориулж их авдаг.

-Хөмүүл сорс гэдэг нь ямар бүтээгдэхүүн юм бэ?  Хөмүүлийн шүүсийг хэрхэн хэрэглэдэг вэ?

-Хөмүүл сорс нь монгол перец л гэсэн үг, ямар ч хоолонд хэрэглэж болно. Хөмүүлийн шүүс бол хоол амтлагч юм. Мах шарахад дүрлэг маягаар хэрэглэж болно. Аялал жуулчлалаар авч явахад мууддаггүй учир хүмүүс авах нь их.

-Нэг суурин нэг бүтээгдэхүүн аян, Жижиг дунд үйлдвэрийн газраас зохион байгуулж буй үзэсгэлэн худалдааны талаар юу хэлэх вэ?  

-Манай компани дотоодод гадаадад олон удаа үзэсгэлэн худалдаанд оролцсон. Жижиг дунд үйлдвэрийн газраас жижиг дунд үйлдвэр эрхлэгчдээ дэмждэг, үзэсгэлэн худалдаа зохион байгуулж олон нийтэд таниулдагт нь талархдаг.

-Танай брэндийн борлуулалт хэр их вэ?

-Борлуулалт дажгүй сайн. Ялангуяа манай бэлгийн багц гэж гаргасан зориулалтын багцыг гадна дотноос ирсэн хүмүүс маш их авдаг. ISO стандарт нэвтрүүлсэн учир  хил гаалиар ямар ч асуудалгүй гардаг. Мөн тэмдэглэлт ойн баяраар хэдэн зуугаар нь авдаг. 

-Гадаад улсын компанитай байгуулсан гэрээ бий юу. Зүгээр л хувь хүмүүс авдаг юм уу?

-Хувь хүмүүс л авдаг. Гэрээгээр нийлүүлэх талаар бас судалж үзэж байгаа. Япон БНСУ руу гаргахаар яригдаж байгаа юм бий.

-Танай бүтээгдэхүүнийг нийслэлд хаанаас авч болох вэ?

-Нийслэлд “Номин”-гийн бүх сүлжээ дэлгүүрүүдэд зарагддаг. Ер нь хүмүүст танигдаад хэрэглээд сурчихсан.