АНГЛИ ХЭЛНИЙ "PEARSON" ХӨТӨЛБӨРТ 3-7 ДУГААР АНГИЙН НИЙТ СУРАГЧ ХАМРАГДАНА

Их Британи, Умард Ирландын Нэгдсэн Хаант Улс (ИБУИНХУ)-ын Гадаад хэрэг, хамтын нөхөрлөл, хөгжлийн сайд Дэвид Камерон өнгөрсөн сард манай улсад албан ёсны айлчлал хийх үеэрээ монгол залуусын англи хэлний боловсролд зориулж 10 сая фунтийн дэмжлэг үзүүлэхээ илэрхийлсэн талаар өмнө мэдээлж байсан. 

Боловсрол, шинжлэх ухааны сайд Л.Энх-Амгалан өнөөдөр (2024.05.14) ИБУИНХУ-аас манай улсад суугаа Онц бөгөөд Бүрэн эрхт  Элчин сайд хатагтай Фиона Блайтыг хүлээн авч уулзаж, дээрх дэмжлэгийг хэрхэн зарцуулах талаар ярилцлаа.   

ИБУИНХУ-аас үзүүлэх дэмжлэгийг

• 2024-2025 оны хичээлийн жилээс эхлэн ерөнхий боловсролын сургуулийн 3-7 дугаар ангид суралцаж буй нийт сурагчдыг PEARSON англи хэлний хөтөлбөрт хамруулах,
• Бага ангийн англи хэлний багш нарын мэдлэг чадварыг дээшлүүлэх,
• Орон нутгийн боловсролын газар, Боловсролын судалгааны хүрээлэн, Багшийн хөгжлийг дэмжих төв зэрэг холбогдох байгууллагын мэргэжилтнүүдийг сургах чиглэлд  шат дараатайгаар зарцуулахаар  тохирчээ.