Монгол Улсын дээд боловсролын сургалтын байгууллагад элсэн суралцагчдын эх хэлний боловсролын чанар, хэрэглээ, иргэдийн харилцааны соёл, эх хэлний дархлааны түвшин тогтоох Монгол хэл бичгийн шалгалтын дүн өнөөдөр /2024.04.19/ 15 цагт гарна.
Улсын хэмжээнд монгол хэл бичгийн улсын шалгалт 4 дүгээр сарын 6-ны өдөр болсон бөгөөд 35680 хүүхэд оролцохоор бүртгүүлээд байсан юм.
Элсэлтийн шалгалтыг уншаад ойлгох, эх зохион бичих чадвар тус бүр 20 оноо, зөв бичих, монгол бичгээр унших чадвар тус бүр 5 оноо, нийт 50 оноогоор дүгнэж, түүнээ 800 хүртэл оноонд хувирган тооцно. Монгол хэл бичгийн шалгалтын босго оноо 400 байх бөгөөд эх хэлний шалгалтад тэнцэхгүй бол дараагийн бусад элсэлтийн шалгалтыг өгч болох хэдий ч дотоодын их дээд сургуульд элсэн суралцах боломжгүй.
Манай хүүхдүүдийн монгол хэлний түвшин ямар байгаа вэ гэдгийг элсэлтийн шалгалтын дүн харуулна.
Өнгөрсөн 2023 оны шалгалтын статистикийг харвал монгол хэл бичгийн эхний элсэлтийн шалгалтаар 30879 шалгуулагчаас 26017 нь тэнцэж, нийт оролцогчийн 15 хувь буюу 4862 нь шалгалтад тэнцээгүй. Монгол хэл бичгийн ЭЕШ-д 2023 онд улсын хэмжээнд 36 хүүхэд 800 оноо авснаас Баянзүрх дүүрэгт 6, Хөвсгөл аймаг, Чингэлтэй, Хан-Уул дүүрэгт тус бүр 4, Дорноговь, Орхон, Сэлэнгэ, Төв аймаг, Сүхбаатар дүүрэгт тус бүр 2, Архангай, Баянхонгор, Ховд, Хэнтий, Өвөрхангай аймгууд болон Баянгол, Сонгинохайрхан, Налайх дүүрэгт тус бүр 1 суралцагч 800 оноотой шалгагдсан байдаг.
Сэтгэгдэл (0)
Сэтгэгдэл бичигдээгүй байна