ЧАРЛЬЗ БУКОВСКИ: ХӨХ ШУВУУ

Зүрхэнд минь байх нэг хөх шувуу гарч нисэхийг хүснэ 

гэвч би түүнд “наанаа байж бай, 
чамайг хэнд ч харуулахгүй” гэж хатуурхана

Зүрхэнд минь байх нэг хөх шувуу гарч нисэхийг хүснэ 
гэвч би дээрээс нь шарз асгачихаад тамхины утаагаа уушиглана 
янхан, баартендер, дэлгүүрийн худалдагчдын хэн нь ч 
түүнийг зүрхэнд минь байдгийг эс мэднэ 

Зүрхэнд минь байх нэг хөх шувуу гарч нисэхийг хүснэ 
гэвч би түүнд “зүгээр байж бай. намайг баллах гээ юу? 
хамаг ажлыг минь нураах нь уу? 
Европт зарагдаж байгаа номын худалдааг минь зогсоох нь уу” гэж аашилна 

Зүрхэнд минь байх нэг хөх шувуу гарч нисэхийг хүснэ 
харин би хэтэрхий ухаантайдаа 
хамаг хүн унтсан хойгуур 
харанхуй шөнөөр л түүнийг гаргаж ирээд 
“байгааг чинь мэдэж байна аа, битгий гунигла” гэж аргадна 

Тэгээд буцаагаад 
зүрхэндээ хийчихнэ 
тэндээ тэр одоо ч дуулан жиргэнэ 
арай ч үхүүлчихэлгүй 
амьтай голтой байлгаж байгаа

Түүнтэйгээ би 

нууцхан гэрээ байгуулчхаад 
одоо ч цугтаа унтаж амарна 

Хөгшин эрийг уйлуулах ч муугүй хэрэг шүү 

гэхдээ би уйлдаггүй юм аа 
харин чи уйлдаг уу?