1992 оны Үндсэн хууль батлагдсаны дараа Монгол Улсын дээд шүүхийн анхны Ерөнхий шүүгчээр томилогдсон Дашдоржийн Дэмбэрэлцэрэнгийн намтар түүх “Нэпко” хэвлэлийн газрын “Түүхэн эрхмүүдийн цадиг”-ын 18 дахь боть болон хэвлэгдлээ.
Нийтлэлч, сэтгүүлч Дашбалбарын Мөнгөндалай, зохиолч Амартайваны Амарсайхан нар Монголын шүүх, хуулийн байгууллагын түүхэнд, цаашилбал ардчилсан нийгмийн тогтолцоонд шилжихэд түүхэн үүрэг гүйцэтгэсэн энэ эрхэм хүний талаарх номыг бичиж туурвисан байна.
Хорин бүлэгтэй номын бараг тэн хагас нь Монгол улсын хууль цаазын түүхийн талаар өнө эртнээс өнөөдрийг хүртэл өгүүлсэн нь баримт талаасаа үнэхээр үнэ цэнэтэй бүтээл болжээ.
Д.Дэмбэрэлцэрэн нь 1990-1999 онд Дээд шүүхийн дарга, Ерөнхий шүүгчээр ажилласан бөгөөд түүнийг эрх зүйн болон бичгийн өндөр боловсролтой, зан чанарын хувьд даруу, дөлгөөн ч шүүхийн хараат бус байдлын талд бат зогсдог, дэвшилтэт үзэлтэй нэгэн байсан гэж хамтран ажиллаж байсан шүүгчид, найзууд, эргэн тойрныхон нь дүгнэдэг.
Өвөрхангай аймгийн Бүрд суманд ХХ зууны дундуур төрж, хөдөөх амьдралаар өсөж, хуучин Зөвлөлт Холбоот Улсад эрхзүйчийн боловсрол эзэмшсэн Д.Дэмбэрэлцэрэн социализмын тоталитари тогтолцооноос ардчилсан эрхзүйт нийгэмд шилжин хуульзүйн салбараа агуулгаар нь бүрмөсөн өөрчлөн байгуулсан жилүүдэд ажиллаж амьдарч, сонирхолтой хувь тавиланг туулсан байдаг. Тэрбээр ардчилсан Үндсэн хуулийг батлах үйл явцад анхнаас нь эхэлж оролцсон, орчин цагийн шүүхийн байгууллагын хөгжилд том хувь нэмэр оруулсан бөгөөд номд энэ талаар тодорхой өгүүлжээ.
Сэтгэгдэл (0)
Сэтгэгдэл бичигдээгүй байна