СУРАГЧИД БИЕ ДААЛТЫН ДОЛОО ХОНОГООР ГАМШИГ ОСЛООС ХАМГААЛАХ ДАДЛАГА СУРГАЛТАД ХАМРАГДАНА

Боловсролын сайдын тушаалаар аймаг, сум, багийн болон нийслэлийн ерөнхий боловсролын сургуулийн хичээлийн жилийн бүтцийг батлахдаа 2024-2025 оны хичээлийн жилд I, II улиралд бие даалтын 7 хоног байхаар тусгасан. 

2024-2025 оны хичээлийн жилийн II улирлын бие даалтын 7 хоног:

• Нийслэл: 2025 оны 3 дугаар сарын 31-ний өдрөөс 4 дүгээр сарын 04-ний өдрийг дуустал
• Орон нутаг: 2025 оны 3 дугаар сарын 24-ний өдрөөс 3 дугаар сарын 28-ны өдрийг дуустал

Энэ удаагийн бие даалтын долоо хоногоор “Аюулгүй амьдрах ухаан” сургалтын хөтөлбөрийн хэрэгжилтэд дэмжлэг үзүүлэх хүрээнд Онцгой байдлын ерөнхий газар, Боловсролын ерөнхий газраас төв орон нутгийн Онцгой байдлын газар, хэлтэс, аврах ангитай хамтран зохион байгуулж байгаа аж. 

Энэ хүрээнд ОБЕГ-ын харьяа 116 дугаар анги Гамшгаас хамгаалах сургалтын төв дээр ЕБС-ийн сурагчид “Аюулгүй амьдрах ухаан” сургалтын хөтөлбөрийн дагуу гамшиг ослоос өөрийгөө болон бусдыг авран хамгаалах мэдлэг дадлага олгох сургалтад хуваарийн дагуу хамрагдаж байна.