Сурагчдын хоёрдугаар улирлын хичээл өнөөдрөөс /2025.01.27/ эхэлж байна.
Засгийн газар дөнгөж бүрдмэгц Боловсролын сайд П.Наранбаяр анхны тушаалаараа 2024 оны долдугаар сарын 19-нд хичээлийн жилийн бүтцийг баталсан юм.
Энэ хичээлийн жилийн төлөвлөлтийн нэг онцлог нь бие даалтыг оруулж ирсэн явдал, бас нийслэл болон орон нутгийн сурагчдын амралтыг өөр өөрөөр төлөвлөсөн.
Нийслэлийн сурагчдын хувьд хоёрдугаар улирлын хичээл өнөөдрөөс эхлэн есөн долоо хоног танхимаар үргэлжлээд дөрөвдүгээр сард бие даалтын долоо хоног эхэлж, үргэлжлүүлэн нэг долоо хоног амарна.
Харин орон нутгийн сурагчдын хувьд хоёрдугаар улирлын хичээл өнгөрсөн долоо хоногийн даваа гаригт буюу 2025 оны 1 дүгээр 20-нд эхэлсэн юм. Тэдний хувьд мөн л есөн долоо хоног танхимаар хичээллээд гуравдугаар сарын сүүлээр бие даалтын долоо хоног эхэлж, үргэлжлүүлэн хоёр долоо хоног амрах юм. Цаг уурын өөрчлөлт, хаваржилтын /мал төллөх хугацаа/ нөхцөл байдлаас хамааран хоёрдугаар улирлын амралт, бие даалтын үйл ажиллагааг нэг долоо хоног урагшлуулж болохоор сайдын тушаалд тусгасан байна.
Сэтгэгдэл (0)
Сэтгэгдэл бичигдээгүй байна