Зун цаг ирлээ. Зун цаг ирнэ гэдэг шумуул бас ирлээ гэсэн үг. Шумуул ирнэ ээ гэдэг хатгуулна аа гэсэн үг. Гэхдээ үгүй ээ, тэдэнд хатгуулахгүй байх аргыг Вашингтоны Их сургуулийн хэсэг эрдэмтэд судалгааныхаа дүгнэлтдээ дурдсан байна.
Эрдэмтдийн тогтоосноор шумуул улаан, улбар шар, хар өнгөнд “дурладаг” гэнэ. Харин бусад өнгийг хайхардаггүй ажээ. Мөн шумуул “хохирогч”-ийг үнэрээр таньж очдог нь бол тогтоогдчихсон зүйл. Нүүрстөрөгчийн давхар ислийн үнэрийг бидний амьсгалаас мэдэрмэгцээ нүд нь өнгийг сканнерддаг аж. Тэгээд тэр даруй хоол руугаа шунгинан ордог ажээ. Харин Вашингтоны эрдэмтдийн судалгаа шумуулын оройн хоол болчихгүй байх боломжийг та бидэнд нээж өглөө.
“Шумууланд хатгуулахгүйн тулд яах вэ?” гэж олон хүн надаас асуудаг юм. Амьсгал, хөлс, арьсны дулаан гэх гурван хүчин зүйл шумуулд нөлөөлдөг гэж би хариулдаг байлаа. Харин энэ судалгаагаар бид дөрөв дэх хүчин зүйлийг тогтоолоо. Энэ бол өнгө. Улаан өнгө. Арьсны өнгө бол энд хамаагүй. Шумууланд хүн бүрийн арьс хурц улаан болж харагддаг. Харин энэ “сэтгэл татам” улаан өнгийг ямар өнгийн хувцсаар далдлавал хатгуулахгүй өнгөрч болох вэ гэдэгт асуудал байгаа юм” хэмээн эрдэмтэн Жеффри Риффелл өгүүлжээ.
Шумуулын нүд өнгийг хүнийх шиг мэдэрдэггүй. Тэд ихэвчлэн улаан, улбар шар, хар өнгөнд татагддаг. Харин бусад өнгө буюу ногоон, цагаан өнгийг хайхардаггүй гэнэ.
Судалгааны явцад ногоон өнгийн бээлий өмсөхөд шумуул тэгтлээ мэдэрч, таашааж очихгүй байсан аж. Харин улаан, улбар шар, хар өнгийн бээлий өмсмөгц улайран дайрах хандлага ажиглагджээ.
Сэтгэгдэл (0)
Сэтгэгдэл бичигдээгүй байна