Д.АМАРБАЯСГАЛАН: "АЧИТ ИХТ"-ИЙН ОВООЛГО ЭРДЭНЭТ ҮЙЛДВЭРИЙН ӨМЧ БАЙХ ЁСТОЙ

Засгийн газрын хуралдаанаас "Ачит Ихт" компанитай холбоотой гарсан шийдвэрийн талаар ЗГХЭГ-ын дарга Д.Амарбаясгалан мэдээлэл өглөө. 

Д.Амарбаясгалан “Засгийн газрын хуралдаанаас  Эрдэнэт үйлдвэрт тодорхой чиглэлүүд өглөө.

Үүнд, нэгдүгээрт, “Ачит Ихт” компанийн 34 хувийг  Эрдэнэт үйлдвэр эзэмших хамгийн анхны буюу 2014 онд байгуулж байсан гэрээгээ биелүүлэх үүрэг чиглэл өглөө. “Ачит Ихт" компани 2003 онд байгуулагдаад 2009 онд хувьцаа эзэмшигчид нь өөрчлөгдөөд 2013 онд Эрдэнэт үйлдвэртэй анхлан гэрээ байгуулж овоолго ашиглах нөхцөл нь үүсэж байсан байдаг. 2014 онд байгуулсан гэрээ нь бол 34 хувийг нь "Эрдэнэт үйлдвэр" эзэмшихээр гарч байсан. Харамсалтай нь 2015 онд Эрдэнэт үйлдвэрээс гарсан ажлын хэсэг уг гэрээг дүгнээд, Эрдэнэт үйлдвэрт ашиггүй учраас эзэмшлээсээ татгалзах нь зүйтэй гэж шийдвэр гарсан байдаг. Уг шийдвэрийг хүчингүй болгож,  шийдвэрийг гаргаж байсан албан тушаалтнуудыг хууль хяналтын байгууллагаар шалгуулах нь зүйтэй гэж үзсэн. Яагаад гэхээр өнгөрсөн 8 жилийн хугацаанд "Ачит Ихт" компанид нийт борлуулалтын орлого нь 535 орчим сая долларын борлуулалтыг хийсэн байдаг. Үйл ажиллгааны зардал маш бага хэмжээтэй гарсан байдаг. Яагаад гэвэл энэ бол үүсмэл орд, бий болгоход Эрдэнэт үйлдвэр 500 орчим сая долларыг зарцуулсан  учраас тус ордыг ашиглаад олсон орлого бол зүй ёсоор "Эрдэнэт үйлдвэрт" тодорхой хувь нь шингэж байх  ёстой. 

Хоёрдугаарт, өнгөрсөн 8 жилийн хугацаанд эзэмшиж олох байсан орлого буюу алдагдсан боломж 34 хувьд ногдох ашгийг 8 жилийн хугацаагаар нь нэхэмжлэх үүрэг, чиглэлийг өнөөдрийн Засгийн газрын хуралдаанаас Эрдэнэт үйлдвэрт өгсөн. 

Гуравдугаарт, 500 орчим сая долларыг зарж бий болгосон үүсмэл орд өөрөө 100 хувь Эрдэнэт үйлдвэрийн 100 хувийн өмч байх ёстой.  Тэгэхээр “Ачит Ихт” компани өмчлөөд байгаа овоолго өөрөө 100 хувь Эрдэнэт үйлдвэрийн өмч байх ёстой. Энэ чиглэлээр Эрдэнэт үйлдвэрийг өөрөө судлаад холбогдох шийдвэрийг гаргаж ажиллах үүрэг чиглэл өгсөн.” гэв.