МОНТЕ-КАРЛО-47 НААДАМД АМЖИЛТТАЙ ОРОЛЦСОН УРАН БҮТЭЭЛЧДЭД БАЯР ХҮРГЭЖЭЭ

Монакогийн Вант Улсын Монте-Карло хотноо зохион байгуулагдсан “Монте-Карло-47” олон улсын циркийн наадамд амжилттай оролцсон Монголын циркийн уран бүтээлчдээ Соёл, спорт, аялал жуулчлалын сайд Ч.Номин хүлээн авч уулзан, баяр хүргэжээ.

Циркийн олимп хэмээгддэг энэхүү нэр хүндтэй тэмцээнд манай уран нугараачид, акробатчид онцгой амжилт гаргаж, алт, хүрэл цом хүртэн, Монголын циркийн урлагийн гайхамшгийг дэлхий дахинаа харуулсан. Үүнд:

• Т.Буд багштай "X-Roses" уран нугараачид “New Generation category” төрөлд АЛТАН ЦОМ
• Н.Эрдэнэ, Н.Энхболд багштай акробатын залуу жүжигчид “Ultra Jump” үзүүлбэрээр ХҮРЭЛ ЦОМ
• МУГЖ Б.Баттулга насанд хүрэгчдийн төрөлд “Strongman” үзүүлбэрээр ТУСГАЙ ШАГНАЛ хүртсэн юм.

Мөн 8 настай Б.Чингүүнжин "Монте-Карло-47" наадмын хамгийн бяцхан оролцогчоор тодорч, 2 метрийн өндөр тулгуур дээр 8 минут тогтсон амжилт үзүүлжээ.