Хууль зүйн туслалцааны төвөөс 2024 онд 2924 иргэнд өмгөөллийн үйлчилгээ үзүүлж, 11498 иргэнд хууль зүйн асуудлаар зөвлөгөө, мэдээлэл өгч, 3153 баримт бичгийг төлбөрийн чадваргүй иргэдэд боловсруулж, үйлчилжээ.
Мөн “Хууль зүйн туслалцааны нэгдсэн систем”-ийг үйл ажиллагаандаа нэвтрүүлж, Хэнтий аймгийн Бор-Өндөр, Сэлэнгэ аймгийн Сайхан, Өвөрхангай аймгийн Хархорин сумдад шинээр салбар нээн хууль зүйн үйлчилгээний хүртээмжийг нэмэгдүүлсэн, улсын өмгөөлөгчдийг техник тоног төхөөрөмжөөр хангаж, цалинг нэмэгдүүлэн ажиллах нөхцөл, нийгмийн баталгааг дээшлүүлсэн байна.
Тус төв оны ажлаа дүгнэж, эрхэлсэн ажилдаа идэвх зүтгэл гарган үр бүтээлтэй ажиллаж буй албан хаагчдыг шагнаж, урамшуулжээ.
Тухайлбал, Хууль зүйн туслалцааны төвийн Сургалт, сурталчилгаа, олон нийттэй харилцах хэлтсийн судалгаа хариуцсан мэргэжилтэн У.Орхон, Баянзүрх дүүрэг дэх салбарын улсын өмгөөлөгч Д.Оргил, Налайх, Багахангай дүүрэг дэх салбарын улсын өмгөөлөгч Б.Жаргалсайханыг Хууль зүй, дотоод хэргийн яамны “Хүндэт жуух бичиг”-ээр шагнасан байна.
Монгол Улсын Нийслэл Улаанбаатар хотыг хөгжүүлэх, нутгийн өөрөө удирдах байгууллагыг бэхжүүлэх үйл хэрэгт оруулсан нэмрийг үнэлж Чингэлтэй дүүрэг дэх салбарын улсын өмгөөлөгч Г.Өсөхбаярыг Нийслэлийн иргэдийн Төлөөлөгчдийн Хурлын “Хүндэт тэмдэг”-ээр, Сүхбаатар дүүрэг дэх салбарын улсын өмгөөлөгч А.Буянжаргал, Сургалт, судалгаа, олон нийттэй харилцах хэлтсийн даргын албан үүргийг түр орлон гүйцэтгэгч Л.Батчимэг, Хан-Уул дүүрэг дэх салбарын улсын өмгөөлөгч Ч.Загдсүрэн нарыг Нийслэлийн иргэдийн Төлөөлөгчдийн Хурлын “Хүндэт үнэмлэх”-ээр тус тус шагнажээ.
Сэтгэгдэл (1)