Завхан аймгийн Идэр сумын Идэр голд сүргээсээ үлдсэн гангар хун шувууг өнгөрсөн даваа гарагт нүүлгэн шилжүүлжээ. Гангар хун шувууг Хар ус нуурын байгалийн цогцолборт газрын Юмын хоолойд өвөлжиж буй хунгийн сүрэгт Идэр сумын Байгаль орчны хяналтын улсын байцаагч С.Ганбаатар, Байгаль хамгаалагч Т.Энхээ, Ц.Сүх-эрдэнэ, Дөргөн сумын Засаг дарга н.Цэдэн-иш нар амжилттай шилжүүлэн тавьсан байна.
Монгол оронд усны шувууд өвөлждөг маш цөөн тооны газар байдаг ба тэдгээрийн нэг нь Хар ус нуурын байгалийн цогцолбор газарт багтах Чоно харайхын гол, Юмын хоолой юм. Энд гангар хун болон зарим зүйл усны шувууд тогтмол өвөлждөг. 1995 оны судалгаагаар 400 орчим гангар хун, 2500 орчим алаг шунгаач, 4800 орчим зэрлэг нугас бүртгэгджээ.. Харин 2000 оны 1 сард хийсэн судалгаагаар 400 орчим гангар хун, 370 орчим алаг шунгаач, 130 хумхин бохио өвөлжиж байсан байна. Тэр үеийн судалгаагаар ойролцоогоор 1000 орчим усны шувууд тоологдсон байдаг. Хамгийн сүүлд 2013 онд ХУНБЦГ-ын ажилтнуудын хийсэн судалгаагаар гангар хун 110 гаруй, 300 орчим алаг шунгаач, 50 гаруй зэрлэг нугас, 94 хумхин бохио тоологдсон байна Эдгээр мэдээлэл нь Монгол орны хэмжээнд усны шувуу хамгийн олон тоогоор тогтмол өвөлждөг цорын ганц нутаг болохыг харуулж байна.
Сэтгэгдэл (0)
Сэтгэгдэл бичигдээгүй байна