МҮХАҮТ-ЫН ЕРӨНХИЙЛӨГЧИД НЭР ДЭВШИГЧ Т.ДҮҮРЭНГ СОНГУУЛИЙН ӨМНӨХ ӨДӨР ЯАГААД ХОРИВ?

Маргааш /2024.11.28/ товлогдсон Монголын үндэсний худалдаа аж үйлдвэрийн танхимын ээлжит бус XXII их хурлын үеэр болох  тус танхимын Ерөнхийлөгчийн нөхөн сонгууль олны анхаарлыг татаж байна.

Энэ сонгуульд Т.Дүүрэн, “Таван богд”-ын Ц.Баатарсайхан, “Урбанек”-ийн Г.Лхагважав  нар өрсөлдөх нь олон нийтэд ил болоод байгаа юм. Гэтэл яагаад ч юм Танхимын Ерөнхийлөгчийн сонгуулийн яг өмнөх өдөр буюу өнөөдөр  /2024.11.27/ Т.Дүүрэнг  гуч хоног хорихоор болов. Хэнийг энэ сонгуульд ялуулах гэж хаанаас шидсэн чулуу сонгогдох магадлал өндөртэй Т.Дүүрэнг онилчихов гэж сэтгүүлчид бичиж байна.  

Т.Дүүрэн өөрийн сошиал хуудаснаа “ Намайг үндэслэлгүй хэргээр гэнэт дуудаж 30 хоног таслан хорихоор боллоо. Миний бие өөрийн биеэр бус ч Танхимын нөхөн сонгуульд оролцох эрмэлзэлтэй байгааг үүгээр мэдэгдэж байна” гэж бичсэн нь олны анхаарлыг өөрийн эрхгүй татаж байна. Үүгээр ч зогсохгүй өчигдөр MNB сувгаар ярилцлага өгөх байсан ч гаргахыг нь хориглосныг ч бичсэн юм.  

“...Үг хэлэх, өөрийгөө өмгөөлөх бүх эрхийг хязгаарлалаа. Энэ улсад хувийн хэвшлийн орон зай байхгүй болжээ. Өнөөдөр намайг, маргааш та нарыг дуудаж  таслан хорих  аж” хэмээсэн билээ.  

МҮХАҮТ бол эртнээсээ л Монголын хувийн хэвшлийнхнийг, бизнес эрхлэгчдийг эгнээндээ нэгтгэсэн хамгийн том байгууллага байсаар ирсэн. Улс төртэй төдий л хутгалдаагүй, харьцангуй бие даасан онцлогтой ч байлаа. Гэтэл яагаад гэнэт энэ танхимын Ерөнхийлөгчийн нэр тодрохын өмнөх өдөр гол өрсөлдөгч нь хоригдчихов. Т.Дүүрэнг хорьсон нь Танхимын Ерөнхийлөгч тодрохтой зэрэгцэж буй нь зайлшгүй холбоо хамааралтай гэж сэтгүүлчид ч бизнесийнхэн ч үзэж байгаа юм. 

Улс төрийн оролцоотой гэж таамаглах хүн ч олон байна. Т.Дүүрэнгийн гол өрсөлдөгч нь Таван богдын Ц.Баатарсайхан бөгөөд улс төрийн дэмжлэг ихтэй, энэ сонгуульд ялах гэж хамгийн их хичээж байгаа хүн гэцгээж байгаа юм. 

МҮХАҮТ-ын Ерөнхийлөгч маргааш тодорно. Хэн Ерөнхийлөгч болохыг сэтгүүлчид олон нийт бүгд анхааран харж байна. Энэ сонгуулийн өмнөх өдөр хоригдохдоо Т.Дүүрэн Ерөнхийлөгчид нэр дэвшсэн хэвээр байгаагаа цахим хуудастаа мэдэгдсэн. Өөрөөр хэлбэл  хоригдож байгаа ч нэрээ татахгүй гэсэн юм. Ийнхүү хорьсноос үүдэлтэйгээр түүнийг дэмжинэ гэж мэдэгдэж байгаа бизнес эрхлэгчид ч бас байгаа юм.