"Хотын бүсгүй хөдөө нутагт-10" нэвтрүүлгийн оролцогч малчин залуу Г.Ганхүрэлийг сошиал сүлжээнд эергээр үнэлж байгаа хүн олон байна. Зэвсэгт хүчний жанжин штабын цахим хуудаст ахмад Д.Болор Г.Ганхүрэлийн талаар бичсэнийг дор нийтлэв.
"ХҮНДЭТ ХАРУУЛЫН МОРЬТОН ЦЭРЭГ ЯВСАН МАЛЧИН Г.ГАНХҮРЭЛ
"ETV" телевизийн уран бүтээл “Хотын бүсгүй хөдөө нутагт-10” нэвтрүүлгийн оролцогч Баянхонгор аймгийн Заг сумын малчин залуу Г.Ганхүрэлийг онцолсон эерэг давлагаа сошиал хуудаснаа түгсээр байна. Түүний малч ухаан, хошин мэдрэмж, хэвлүүхэн яриаг онцолж, эх орныхоо хөдөө хээр талыг эзэнтэй болгож яваад нь талархал илэрхийлэх хүмүүс олон байна. Тэгвэл хотын бүсгүйн болзоот малчин залуу нь 2021-2022 онд Зэвсэгт хүчний 032 дугаар ангид хугацаат цэргийн албаа хаасан, хүндэт харуул явсан эр юм. Ингэхдээ бүр Үндэсний их баяр наадамд Монгол төрийн есөн хөлт цагаан тугийг залах, цэнгүүлэхэд хүлэгтэйгээ хамт үүрэг гүйцэтгэж явсан морьтон дайчин байжээ.
Зэвсэгт хүчний 032 дугаар ангийнхан моринд эрэмгий, малд нүдтэй, олонтой нийцтэй залуу байна хэмээн түүнийг есөн хөлт цагаан тугийг залах, цэнгүүлэхэд болон дэлхийн орнуудын төрийн тэргүүний айлчлалын үеэрх морьтон дайчнаар бусад онжавуудынх нь адилаар томилон үүрэг гүйцэтгүүлдэг байсан юм. Түүнийг албаа нэр төртэй хаагаад халагдахад нь “Торгон цэрэг” медаль, “Тамирчин дайчин” тэмдгээр шагнаж, бахархалт албаа сум орон нутагтаа сурталчлан таниулахын зэрэгцээ эх орны эр цэрэг хэмээх эрхэм алдрыг өндөрт өргөж яваарай хэмээн захижээ.
Ахмад Д.БОЛОР" гэсэн байна.
Сэтгэгдэл (0)
Сэтгэгдэл бичигдээгүй байна