Төрийн цахим үйлчилгээний зохицуулалтын газраас "Бүх нийтийн цахим ур чадварын IV үе шатны сургалт"-ыг өсвөр насны хүүхдүүд, ахмад настан, хөгжлийн бэрхшээлтэй иргэдэд мэдээллийн технологийн суурь мэдлэг олгох, багаар ажиллах чадварыг эзэмшүүлэх чиглэлээр зохион байгуулахаар болжээ.
Боловсролын ерөнхий газар, “Мэдээлэл технологийн үндэсний парк” ТӨААТҮГ-тай хамтран зохион байгуулах уг сургалт нь иргэдийн цахим орчин дахь бүтээлч байдлыг хөгжүүлэх зорилготой юм.
Тухайлбал, мэдээллийн технологийн чиглэлээр суралцах сонирхолтой хүүхдүүдийг дэмжих, өсвөр үе, залуучуудаар дамжуулан бүх нийтийн цахим ур чадварыг сайжруулах, төрийн цахим үйлчилгээний хүртээмжийг нэмэгдүүлэх зорилгоор аймаг, дүүргийн Засаг даргын дэргэд ахлах ангийн сурагчдын "Хурдан" клубыг байгуулж, дэмжиж ажиллахаар болсон байна. Ийнхүү ахлах ангийн сурагчдын "Хурдан" клуб байгуулж ажилласнаар мэдээллийн технологийн чиглэлийн төсөл хөтөлбөрт сурагчдыг хамруулах боломжууд нэмэгдэх юм.
Өмнө нь тус газраас цахим засаглалын хөгжлийн индексийн үзүүлэлтийг нэмэгдүүлэх зорилгоор бүх нийтийн цахим ур чадвар олгох, дээшлүүлэх, кибер аюулгүй байдал гэсэн агуулгын хүрээнд 3 удаагийн сургалтуудыг улсын хэмжээнд үе шаттайгаар зохион байгуулж 100 мянга гаруй төрийн албан хаагч, ахлах ангийн сурагч, иргэдийг хамруулан ажилласан билээ.
Сэтгэгдэл (0)
Сэтгэгдэл бичигдээгүй байна