Парисын олимпын наадамд оролцох АНУ-ын сагсанбөмбөгийн шигшээ багт NBA-гийн финалын цувралын MVP Жэйлэн Брауныг багтаагаагүй.
Яагаад MVP-г шигшээ багт багтаагаагүй нь мэдээж олны анхаарлыг татаж, гайхшрал төрүүлсэн. Тэгвэл энэхүү шийдвэр нь Nike-ийг Жэйлэн Браун шүүмжилсэнтэй холбоотой гэж тоглогч өөрөө бодож буй юм байна.
“Энэ нь Nike-ийг шүүмжилсэнтэй холбоотой гэдэгт огт эргэлзэхгүй байна. Энэ талаар нэмж мэдээлэл хийх болно. Гэвч яг одоогоор бол би тайлбар хийе гэсэн бодолгүй байна” хэмээн Жэйлэн Браун өгүүлжээ.
Хэдэн хоногийн өмнө Кавай Леонард олимпын шигшээд багтан тоглох боломжгүй нь тодорхой болж, түүний оронд Деррик Уайтыг дуудсан. Энэ сонголтод олон хүн дургүйцсэн. Учир нь яг байрлалынх нь тоглогч биш. Тэгээд ч хамгийн эхэнд дуудагдах хүн нь Жэйлэн Браун гэж бодож байсан юм.
Харин Жэйлэн Браун яагаад Nike-тай зөрчилдөж эхэлсэн бэ гэвэл Кайри Ирвинг еврейчүүдийг үзэн ядах утга агуулгатай баримтат киног сошиал шэйрлэж түгээсэн юм. Үүний дараагаар Ирвингийг Nike шүүмжилсэн. Гэтэл Ирвингийг шүүмжлэх ямар эрх байгааг нь Жэйлэн Браун асуун эгдүүцсэн байдаг.
“Хэзээнээс эхлээд Nike тамирчдад ёс суртахуун заадаг болоо вэ?” хэмээн Жэйлэн Браун өгүүлээд Коби Брайантын пүүзийг өмссөн хэвээрээ үлдсэн ч Nike гэсэн логог нь арилгах болсон юм. Өнгөрсөн улиралд ч мөн тэгсэн.
Nike АНУ-ын шигшээ багтай олон жилийн турш ивээн тэтгэгчийн эвтэй найрсаг харилцаатай байсаар ирсэн тул өөрийн гэсэн нөлөөтэй байх магадлалтай юм.
Сэтгэгдэл (0)
Сэтгэгдэл бичигдээгүй байна