Өнөөдөр буюу 2026 оны аравдугаар сарын таван Монголын сагсанбөмбөг, спортын түүхэнд тодоор бичигдэн үлдэх болно.
Эл өдөр Шаравжамцын Энхийн-Од ( Mike Sharavjamts) дэлхийн хамгийн хүчирхэг спортын лигийн нэг Үндэсний сагсанбөмбөгийн холбооны ( NBA-National Basketball Association) "Орландо мэжик" багтай "Exhibit 10" гэрээг үзэглэснээр НБА-ийн багтай албан ёсны гэрээ байгуулсан Монголын анхны сагсанбөмбөгч боллоо.
"Exhibit 10" ( 10 өдрийн гэрээ ч гэж нэрлэх нь бий) гэрээ нь НБА-ийн багууд тоглогчтой байгуулдаг олон гэрээний ( super max, standard, rookie, 10 day гэх мэт) нэг төрөл нь.
Гол зорилго нь тухайн баг гэрээ байгуулж буй тоглогчоо бэлтгэлийн бааздаа урих, өөр багт алдахгүй байх, "G league"-ийнхээ багт тоглуулах, ур чадвар, бэлтгэл нь хэрхэн өөрчлөгдөхийг бүрэн хяналтад байлгах юм.
Хэдийгээр "10 өдрийн" гэрээ нэртэй ч үргэлжлэх хугацаа нь нэг жил.
Багууд ихэнхдээ улирал эхлэхээс өмнө гэрээ байгуулсан тоглогчоо үндсэн багаасаа чөлөөлж "G League"-ийн багтаа тоглуулахыг зорилгоо болгодог.
Хэрэв тоглогч "G League"-ийн багт тоглохыг зөвшөөрвөл доор хаяж 60 хоног багийн мэдэлд үлдэх бөгөөд 91,000 ам.долларын урамшуулал хүртэх боломжтой.
Мөн үндсэн багийн бүрэлдэхүүнд багтах , эсвэл "Two-Way" гэрээ болгон өөрчлөх, эсвэл бүүр багийг орхиж ч болно.
Манай Энхийн-Одын хувьд "Орландо мэжик" гэрээг байгуулмагцаа багаас чөлөөлсөн.
Одоо "G League" -ийн "Оцеола мэжик" багт тоглох сонголт байгаа. Өөрийн зорилго, хүслээс бүх зүйл шалтгаална.
Ямартай ч Монголын олон мянган хүүхэд залууст, сагсанбөмбөгт шинэ шинэ замыг нээсээр ирсэн Энхийн-Од маань дахин нэг тод замыг гаргалаа. Зам нь дардан байж, хамгийн том зорилгодоо хурдан хүрээрэй дүү минь!
Эх сурвалж: Ц.Энхтүвшин /Таван цагариг сонин/
Сэтгэгдэл (0)
Сэтгэгдэл бичигдээгүй байна