Монгол Улсын Ерөнхий сайдын 2026 оны 154 дүгээр захирамжаар байгуулагдсан орон сууцны захиалгын гэрээний улмаас хохирсон иргэдийн хууль ёсны эрх ашгийг хамгаалах асуудлыг холбогдох хууль тогтоомжийн хүрээнд шалгаж, үүсээд байгаа нөхцөл байдлыг шийдвэрлэх үүрэг бүхий Ажлын хэсгийн ээлжит хуралдааныг 2026 оны аравдугаар сарын 02-ны өдөр Хууль зүй, дотоод хэргийн яаманд зохион байгууллаа.
Хуралдаанаар Ажлын хэсгийн явц, үр дүн, барьж дуусаагүй нийтийн зориулалттай орон сууцны барилгын талаарх мэдээллийг нээлттэй, ил тод болгох чиглэлээр авах арга хэмжээний талаар, орон сууц худалдан авагчийг хамгаалах нэгдсэн цахим системийг туршин, нэвтрүүлэх шийдлийн талаар хэлэлцэв.
Хуралдааны төгсгөлд Хууль зүй, дотоод хэргийн сайд, Ажлын хэсгийн ахлагч Г.Тэмүүлэн орон сууцны залилантай холбоотой гэмт хэргийн мөрдөн шалгах ажиллагааг эрчимжүүлэх, холбогдох байгууллагуудын уялдааг сайжруулах, иргэд залиланд өртөхөөс урьдчилан сэргийлэх арга хэмжээг зохион байгуулах, Шүүхийн шийдвэр гүйцэтгэх байгууллагад явагдаж байгаа шийдвэр гүйцэтгэх ажиллагааны бодит биелэлтийг ахиулах чиглэлээр холбогдох байгууллагуудад үүрэг өглөө.
Түүнчлэн барьж дуусаагүй нийтийн зориулалттай орон сууцны барилгын талаарх мэдээллийг нээлттэй, ил тод болгох чиглэлээр авах арга хэмжээний талаар Засгийн газрын тогтоолын төслийг Засгийн газрын хуралдаанаар хэлэлцүүлэн шийдвэрлүүлэхээр тогтов.
Мөн Нийслэлийн дахин төлөвлөлтийн төслийн хүрээнд инженерийн шугам сүлжээний хөрөнгө оруулалт нь шийдвэрлэгдээгүй байгаа орон сууцны барилга угсралтын ажлыг үргэлжлүүлэх, хөрөнгийг шийдвэрлэх боломж, нөхцөлийг судалж, танилцуулах үүрэг бүхий Ажлын дэд хэсгийг байгуулах Нийслэлийн Засаг даргын саналыг дэмжиж, Ажлын хэсгийг Ерөнхий сайдын захирамжаар байгуулах саналаа хүргүүлэхээр тус тус шийдвэрлэлээ.
Сэтгэгдэл (0)
Сэтгэгдэл бичигдээгүй байна