Монгол Улсад Үндэсний сэтгүүл зүйн салбар үүсэж хөгжсөний 113 жилийн ойн баяр өнөөдөр тохиож байна.
Шинэ толь хэмээх сонин бичгийн анхны дугаар Монгол Улсын Гадаад Явдлын Яам, Хаант Оросын Монгол дахь төлөөний газрын хооронд 1913 оны эхээр байгуулсан хэлэлцээний дагуу 1913 оны 3 дугаар сарын 6-нд хэвлэгдэн гарчээ. Энэ өдрийг Монголын орчин үеийн хэвлэл мэдээллийн салбар үүсэж хөгжсөн өдөр гэж үздэг.
Сонин Оросоос Монголд суугаа төлөөний сайдын ивээлд гарч, хоёр талын эрх ашигт нийцэж байв. Монголын дэвшилт сэхээтнүүд Оросын хэвлэлийн баазыг ашиглан тогтмол хэвлэл гаргахыг зорьж байсан бол Оросууд уг хэвлэлд өөрийн бодлогыг шургуулах эрмэлзэлтэй байсан гэдэг.
Сонины эхний дөрвөн дугаар нь 23*15 см хэмжээтэй 50-60 хуудастай сэтгүүлийн маягаар, дараах 16 дугаар нь 34*26 см хэмжээтэй 6-10 нүүр бүхий сонины хэлбэрээр, нийт 20 дугаар гарсан юм. Нэг дугаар нь 500 хувиар гарч, Монголын төрийн байгууллагуудад үнэгүй тараагдаж, хөдөлмөрчдөд сонин худалдах цэгээр дамжин тардаг байв. Сонины эрхлэгчээр Жамсрангийн Цэвээн ажиллаж, Монголын анхны хэвлэлийг гаргах үйлсэд томоохон хувь нэмэр оруулсан юм.
Энэ өдрийг 1990-ээд оноос хойш дээрх өдрийг Сэтгүүлчдийн өдөр буюу Үндэсний сэтгүүл зүй үүссэн өдөр хэмээн тэмдэглэж эхэлсэн бол 2009 оноос жил бүрийн 3 дугаар сарын 6-нд Хэвлэл мэдээллийн ажилтны өдөр болгон тэмдэглэдэг болсон юм.
Сэтгэгдэл (0)
Сэтгэгдэл бичигдээгүй байна