НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.
COP17-ын бэлтгэл ажилтай холбоотой өнгөрсөн долоо хоногт /2025.12.15-2025.12.21/ өрнөсөн үйл явдлаас заримыг нь тоймлон хүргэж байна.
ЗҮҮН ХОЙД АЗИЙН ЦӨЛЖИЛТ, ШОРООН ШУУРГАНЫ АЖЛЫН ХЭСГИЙН 18 ДУГААР УУЛЗАЛТ COP17-ЫН ҮЕЭР БОЛНО
Байгаль орчин, уур амьсгалын өөрчөлтийн яамны Төрийн нарийн бичгийн дарга Ш.Батбаяр Япон Улсын Байгаль орчны яамны Хүрээлэн буй орчны менежментийн газрын Олон улсын хамтын ажиллагааны албаны дэд дарга Юми Ясуда, Ази дахь Агаарын бохирдлын судалгааны төвийн (ACAP) захирал Кэнъичи Сато нарыг 2025 оны 12 дугаар сарын 16-ны өдөр хүлээн авч уулзжээ.
Уулзалтаар манай улсад болох СOP17 бага хурлын үеэр Зүүн Хойд Азийн Цөлжилт, шороон шуурганы ажлын хэсгийн 18 дугаар уулзалтыг Улаанбаатар хотноо зохион байгуулах асуудлыг ярилцсан байна.
СОЁЛ, АЯЛАЛ, ЖУУЛЧЛАЛЫН ХӨТӨЛБӨР, ЗОЧИД БУУДАЛ ХАРИУЦСАН ДЭД ХОРООНЫ АНХДУГААР ХУРАЛ БОЛОВ
НҮБ-ын Цөлжилттэй тэмцэх конвенцын Талуудын 17 дугаар бага хурал (COP17)-ын Соёл, аялал жуулчлалын хөтөлбөр, зочид буудал хариуцсан дэд хорооны анхдугаар хурал 12 дугаар сарын 17-ны өдөр болж, дэд хорооны шинэ бүтэц, бүрэлдэхүүнийг танилцуулж, нийт 23 гишүүнтэйгээр үйл ажиллагаа явуулахаар тогтлоо.
Хурлаар COP17 үзэл баримтлал, соёл, аялал жуулчлалын нэгдсэн хөтөлбөр, хурал зохион байгуулах талбайн бүсчлэл “Цэнхэр бүс”, “Ногоон бүс”, дэд бүтцийн ажлын явц, зочид буудлын нөөц, захиалга, хоол үйлдвэрлэл, аюулгүй байдал, бүртгэлийн нэгдсэн системийн асуудлыг дэлгэрэнгүй хэлэлцэж, аялал жуулчлалын хөтөлбөр, соёл урлагийн арга хэмжээг хариуцах хоёр ажлын хэсэг байгуулахаар болжээ.
Бэлтгэл ажлыг үе шаттай хэрэгжүүлэх төлөвлөгөө, VisitUlaanbaatar.mn платформоор дамжуулан аялал жуулчлалын үйлчилгээг цахимжуулах, ЭКО аялал жуулчлалын бодлогыг хэрэгжүүлэх чиглэлийг баталж, олон улсын сурталчилгааг эрчимжүүлэх талаар санал солилцож, холбогдох байгууллагуудын уялдаа холбоо, хариуцлагыг тодорхой болгосон байна.
ДЭД САЙД Б.МӨНХТАМИР БАГА ХУРЛЫН БЭЛТГЭЛ АЖЛЫГ ЭРЧИМЖҮҮЛНЭ
Засгийн газрын хуралдаанаас гаргасан шийдвэрийн дагуу Байгаль орчин, уур амьсгалын өөрчлөлтийн дэд сайд Б.Мөнхтамир Цөлжилттэй тэмцэх тухай НҮБ-ын конвенцын Талуудын 17 дугаар Бага хурлын (COP17) зохион байгуулалт, "Тэрбум мод" хөтөлбөрийн хэрэгжилтийн асуудлыг хариуцахаар болсон.
Дэд сайд Б.Мөнхтамир COP17 зохион байгуулах үүрэг бүхий Үндэсний хорооны Ажлын алба, Нийслэлийн COP17 Хөрөнгө оруулалт, бүтээн байгуулалтын газрын төлөөллийг хүлээн авч уулзан COP17 бага хурлын бэлтгэл ажлын явц, тулгамдаж буй асуудлууд болон салбарын ажлын талаар ярилцсан юм.
Тэрбээр СОР-17 олон улсын хурлыг зохион байгуулах ажлын хүрээнд хийгдэж буй бодлого, төлөвлөлт, хөрөнгө оруулалт, хурлыг зохион байгуулах барилга байгууламжийн бүтээн босголт зэрэг ажлуудыг эрчимжүүлж, нарийвчилсан төлөвлөгөөний дагуу ажиллах салбар хоорондын уялдааг сайжруулах зэрэг асуудлуудаар холбогдох албаныхантай санал солилцсон. Мөн Үндэсний хорооны ажлын албаны 2025 оны төсвийн санхүүжилттэй холбоотойгоор үүсэж буй нөхцөл байдалтай танилцаж, энэ асуудлыг анхаарч ажиллахаа илэрхийлсэн байна.
Б.Мөнхтамир Байгаль орчин, уур амьсгалын өөрчлөлтийн яам болон Ажлын албаны өргөтгөсөн уулзалтыг тогтмолжуулах, төлөвлөгөөнд тусгагдсан ажлуудыг тодорхой эзэнжүүлж, хэрэгжилтийг цаг хугацаатай, нарийвчилсан төлөвлөлтийн дагуу зохион байгуулахыг холбогдох хүмүүст үүрэг болгосон юм.
Сэтгэгдэл (0)
Сэтгэгдэл бичигдээгүй байна