БОГД ЗОНХОВЫН ИХ ДҮЙЧЭН ӨДӨР ТОХИОЖ БАЙНА

Богд Зонховын их дүйчэн буюу Зулын 25-ны дүйчэн өдөр өнөөдөр /2025.12.14/ тохиож байна. 

Бурхан шашныг үндэслэгч Богд Зонхова нь зургадугаар жарны "Алтан унжлага" хэмээх гал тахиа жилийн  өвлийн эхэн сарын 25-ны үүрийн шаргал гэгээ татахуйд орчлонд мэндэлжээ. Богд Зонхов наймдугаар жарны шороон гахай жилийн өвлийн эхэн сарын 25-ны үдэш таалал төгссөн гэдэг. Түүнээс хойш энэ өдрийг "Зулын 25" хэмээн нэрийдэж, зул өргөн, буян үйлддэг их дүйчэн өдөр болгосон байна.

Эртнээс уламжлан тэмдэглэж ирсэн энэхүү онцгой өдөр хийд оронд ном уншлага өргөн дэлгэр эхэлж, сүсэгтэн олон зул өргөн өглөг буяндаа шамдан оролцдог билээ.

Энэхүү өдөр нь Манзушир бурхны хувилгаан хэмээн алдаршсан Богд Зонхова ламын дүйчэн өдрийг дурсан хүндэтгэх онцгой өдөр юм. Манзушир бурхан бол билиг оюуны бэлгэ тэмдэг бөгөөд амьтны тусын тулд хүний дүрээр бууж мэндэлсэн нь Богд Зонхова лам хэмээн үздэг.

Мөн оюун ухааныг хөгжүүлж, билиг төгөлдөр болохын бэлгэдэл болгон зул өргөдөг уламжлалтай. Зулын гэрэл харанхуйг арилган гийгүүлдэгтэй адил бэлгэшээж, мунхагийн харанхуйг тайлж, оюуны гэгээ, ухааны гэрлийг дэлгэрүүлэхийг ерөөж зул өргөдөг нь энэхүү өдрийн гүн утга юм.

Энэ өдөр зул өргөн, цагаан хоол идэж, маани мэгзэм уншин залбирдаг. Уншсан нэг маани түм болж, нэг зул мянга болон арвижин бие, хэл, сэтгэл ариусан их буян хурдаг хэмээн үздэг.

Дэд хамба, гавж С.Гантөмөр лам хуврагууд, сүсэгтэн олонд нэг өдрийн тэтгэн ариусгахуй буюу тэгчэн сожинг өглөө 7 цагт хүртээсэн байна. 

Гандантэгчэнлин хийдийн тэргүүлэгч, гавж Д.Нямсамбуу олон нийтэд зориулсан “Санамсарын бясалгал"  хичээлийг айлдана. Орчин цагийн амьдралын хэмнэл дунд сэтгэлээ төвлөрүүлж, ухаарал, анхаарлаа төгөлдөржүүлэх онцгой боломж бүрдэх Санамсарын бясалгал хичээл Батцагаан цогчэн дуганд 16- 17 цагт болно.  

Гэрэлт зул өргөх ёслол Жанрайсиг шүтээний өмнөх талбайд  19 цагт болно. 

Монголын Бурханы Шашинтны төв Гандантэгчэнлин хийд жил бүрийн Богд Зонховын дүйчэн буюу Зулын 25-нд Сандуйн чого, Богд ламын чого хурал номын зан үйлийн төгсгөлд Очирдара шүтээн, арван зүгийн 3 цагийн бурхан, Ядам, Сахиус, Баатар дагинас, гурван эрдэнэ бүгдэд эх болсон хамаг амьтныг даатган Энх тайвны мандал өргөдөг билээ. Энх тайвны мандал Очирдара дуганы өмнө 20 цагт өргөнө. 

Гандантэгчинлэн хийдийн лам хуврагууд Зулын 25 - ны дүйчэн өдрийн бэлтгэл ажлыг дүүргэж, өчигдөр /2025.12.13/ их цэвэрлэгээ хийжээ. 

Хийд орон, дуган сүм цэвэрлэхийн тус эрдэм

Будда багш хийд орон, дуган сүм болон өөрийн ойр орчныг цэвэрлэх нь таван их тус эрдэмтэй хэмээн айлджээ. Үүнд: — Өөрийн сэтгэл ариусна — Бусдын сэтгэл ариусна — Тэнгэрүүд баясна — Зүс царай сайжрахын үйлийг хураана — Хойд төрөлдөө сайн заяанд төрнө

Цэвэрлэгээ хийхдээ “тоосыг арилгая, хирийг арилгая” хэмээн айлдан, гадаад хир тоосыг бус өөрийн сэтгэлийн хир болох шунал, уур, мунхгийг ариусгаж байна хэмээн бясалгавал эдгээр тус эрдэм бүрдэнэ.

Иймд ойр орчноо цэвэрлэн ариутгах нь дээдийн номтой нийцэх бөгөөд энэ насандаа эрүүл мэндээ хамгаалах, байгал орчинтой зөв зохистой харьцахын үндэс болж, хойд насандаа ч үлэмж их тус буян хураахын үйл болой.