НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.
COP17-ын бэлтгэл ажилтай холбоотой өнгөрсөн долоо хоногт /2025.11.24-2025.11.30/ өрнөсөн үйл явдлаас заримыг нь тоймлон хүргэж байна.
ҮНДЭСНИЙ ХОРООНЫ АРАВДУГААР ХУРАЛДААН БОЛЛОО
Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг зохион байгуулах Үндэсний хорооны аравдугаар хуралдаан боллоо.
Байгаль орчин, уур амьсгалын өөрчлөлтийн сайд, Үндэсний хорооны дарга Б.Батбаатар хуралдааныг нээж, Уур амьсгалын өөрчлөлтийн тухай НҮБ-ын суурь конвенцын Талуудын 30 дугаар бага хуралд Монгол Улс ямар үүрэг оролцоотой оролцсон болон үр дүнгийн талаар товч мэдээлэл өгсөн юм.
COP17 Зохион байгуулах Дэд хороод буюу Бодлого, төлөвлөлт, хөрөнгө оруулалтын дэд хороо, Аюулгүй байдлын дэд хороо, Дээд, өндөр түвшний арга хэмжээ зохион байгуулах дэд хороо, Хэвлэл мэдээлэл, сурталчилгааны дэд хороо, Соёл, аялал жуулчлалын хөтөлбөр, зочид буудал хариуцсан дэд хороо, Хамтын ажиллагааны дэд хороо, Байр, барилга байгууламжийн дэд хороо, Зам, тээвэр, логистикийн дэд хороо, Харилцаа холбоо хариуцсан Дэд хороодын дарга нар 2025 оны ажлын явц болон 2026 оны ерөнхий төлөвлөгөөгөө танилцуулав.
Үндэсний хорооны аравдугаар хуралдаанаар 2025 оны төсвийн зарцуулалтын гүйцэтгэл, 2026 оны батлагдсан төсвийг танилцуулж, хэлэлцсэн бөгөөд хуралдааны төгсгөлд Үндэсний хорооны дарга Б.Батбаатар Дэд хороодод тодорхой үүрэг, чиглэл өгсөн байна.
ДЭЭД, ӨНДӨР ТҮВШНИЙ АРГА ХЭМЖЭЭ ЗОХИОН БАЙГУУЛАХ ДЭД ХОРОО АНХДУГААР ХУРАЛДААНАА ХИЙВ
Гадаад харилцааны сайд бөгөөд Цөлжилттэй тэмцэх тухай НҮБ-ын конвенцын Талуудын 17 дугаар бага хурал (СOP17)-ыг зохион байгуулах Үндэсний Хорооны Дэд дарга Б.Батцэцэг ахлан тус Үндэсний Дэд Хорооны анхдугаар хуралдааныг 2025 оны 11 дүгээр сарын 25-ны өдөр цахимаар зохион байгуулжээ.
Уг хурлын үеэр дэд хорооны даргын хувьд хийж гүйцэтгэсэн ажлаа гишүүдэд тайлагнаж, хийх ажлын төлөвлөгөөг хэлэлцсэн байна.
Б.Батцэцэг сайд Монгол Улс анх удаа НҮБ-ын хурал хүлээн авч зохион байгуулж буй учраас СОР17 бага хурлыг олон дээд, өндөр түвшний зочдын оролцоотойгоор төлөвлөх нь ач холбогдолтой бөгөөд хөрөнгө оруулалт, санхүүжилт татахад чухал хэмээн онцолсон байна.
ХБНГУ-ЫН ЭСЯ, ОЛОН УЛСЫН ХАМТЫН АЖИЛЛАГААНЫ БАЙГУУЛАГАТАЙ COP17 БЭЛТГЭЛ АЖЛЫН ТАЛААР ЯРИЛЦЛАА
Байгаль орчин, уур амьсгалын өөрчлөлтийн яамны Төрийн нарийн бичгийн дарга Ш.Батбаяр ХБНГУ-ын Элчин сайдын яам, Германы олон улсын хамтын ажиллагааны байгууллага (GIZ)-ын төлөөлөгчидтэй 2025 оны 11 дүгээр сарын 25-ны өдөр уулзалт хийв.
Уулзалтад ХБНГУ-аас Монгол Улсад суугаа ЭСЯ-ны хамтын ажиллагааны хэлтсийн дарга Удо Вэйбер, GIZ-ын Монгол дахь суурин төлөөлөгч Юрген Хатвиг, Байгаль орчны төслүүдийн зохицуулагч Бастиан Флюри нар оролцсон бөгөөд талууд хамтын ажиллагааны хүрээнд санал солилцсон юм.
Тухайлбал, Цөлжилттэй тэмцэх тухай НҮБ-ын Конвенцын Талуудын бага хурлын (COP17) бэлтгэл ажлын талаар онцлон ярилцжээ. Түүнчлэн хоёр тал байгаль орчныг хамгаалах, тусгай хамгаалалттай газар нутгийн сүлжээг нэмэгдүүлэх, ой болон байгалийн нөөцийн тогтвортой менежментийг хэрэгжүүлэх чиглэлээр олон жилийн туршид амжилттай хамтран ажиллаж ирснийг онцлон тэмдэглэсэн байна.
Энэхүү уулзалт нь хоёр талын байгаль орчин, уур амьсгалын өөрчлөлтийн хамтын ажиллагааг улам бататгах, тодорхой төслүүдийн хэрэгжилтийг ахиулахад чухал ач холбогдол бүхий тодорхой ахиц гаргах суурь алхам болжээ.
Сэтгэгдэл (0)
Сэтгэгдэл бичигдээгүй байна