НҮБ-ын Цөлжилттэй тэмцэх конвенцын Талуудын 17 дугаар бага хурал (COP17) манай улсад 2026 оны наймдугаар сарын 17-28-ны өдрүүдэд болно.
COP17-ын бэлтгэл ажилтай холбоотой өнгөрсөн долоо хоногт /2025.11.11-2025.11.16/ өрнөсөн үйл явдлаас заримыг нь тоймлон хүргэж байна.
Б.БАТБААТАР САЙД ҮНДЭСНИЙ ХОРООНЫ АЖЛЫН АЛБАНЫХАНТАЙ УУЛЗЛАА
Байгаль орчин, уур амьсгалын өөрчлөлтийн сайд, COP17 бага хурлыг зохион байгуулах Үндэсний хорооны дарга Б.Батбаатар, БОУАӨЯ-ны Төрийн нарийн бичгийн дарга Ш.Батбаяр, яамны холбогдох газрын дарга нар өнөөдөр НҮБ-ын Цөлжилттэй тэмцэх конвенцын талуудын 17 дугаар бага хурлыг зохион байгуулах Үндэсний хорооны ажлын албаныхныг бүрэн бүрэлдэхүүнээр хүлээн авч, уулзжээ.
Уулзалтын үеэр COP17 бага хурлыг зохион байгуулах Ажлын албаны дарга Д.Батмөнх бүрэлдэхүүнээ танилцуулж, өнгөрсөн зургаадугаар сараас хойш хийж хэрэгжүүлсэн ажлын тайлан болон 2025 оны 11, 12 дугаар сард хийх ажлын төлөвлөгөөгөө танилцуулсан байна.
Үндэсний хорооны дарга Б.Батбаатар “Ажлын албаны даргын танилцуулсан ажлууд эхлэх, хэрэгжих, дуусах хугацааг тодорхой байх хэрэгтэй. Яамны зүгээс тусгайлан ажлын хэсэг гаргаж хяналт тавьж ажиллана. Гаднаас хөндлөнгийн аудит ч авах хувилбар ч байж болно. Монгол Улсад НҮБ-ын Цөлжилттэй тэмцэх конвенцын талуудын 17 дугаар бага хурлыг зохион байгуулах талаарх мэдээллийг олон нийтэд хүргэхэд анхаарч ажиллах хэрэгтэй.” гэдгийг онцолжээ.
ХУВИЙН ХЭВШЛИЙНХЭН ЦӨЛЖИЛТТЭЙ ТЭМЦЭХЭД ХАМТРАХАА МЭДЭГДЭВ
COP17 бага хурлыг угтан “Эрүүл газрын төлөө Монголын бизнесийн төлөө” хэлэлцүүлэг 2025 оны 11 дүгээр сарын 13-ны өдөр зохион байгуулжээ.
Хэлэлцүүлгийг Байгаль орчин, уур амьсгалын өөрчлөлтийн сайд Б.Батбаатар нээж, дэлхий нийтэд газрын доройтлын нөхцөл байдал ноцтой хэмжээнд хүрсэн бөгөөд энэ асуудлыг шийдвэрлэхэд төр, хувийн хэвшлийн хамтын ажиллагаа нэн чухал гэдгийг онцолж, Монгол Улс COP17-г зохион байгуулахдаа олон улсын зочид, төлөөлөгчдийг хүлээн авахын зэрэгцээ манлайлагч, урам зориг өгөгч улс байхыг зорьж буйгаа тэмдэглэжээ.
Хэлэлцүүлгийн төрийн байгууллагууд, хувийн хэвшлийн төлөөлөл, иргэний нийгмийн байгууллагууд болон олон улсын түншлэгчид оролцож, газрын доройтлыг бууруулах, тогтвортой бизнесийн шийдэл болон ногоон хөрөнгө оруулалтыг дэмжих чиглэлээр санал бодлоо хуваалцсан байна.
Арга хэмжээний хүрээнд Монголын Бизнесийн Зөвлөл болон Цөлжилттэй тэмцэх тухай НҮБ-ын конвенцын Талуудын 17 дугаар бага хурлыг зохион байгуулах Үндэсний хорооны Ажлын алба “Хамтран ажиллах тухай санамж бичиг” байгуулж, төр, хувийн хэвшлийн түншлэлийн шинэ шат эхлүүлжээ.
СЭТГҮҮЛЧДИЙГ БАЙГАЛЬ ОРЧНЫ ЧИГЛЭЛЭЭР МЭРГЭШҮҮЛЭХ ХОЁР ДАХЬ СУРГАЛТЫГ АМЖИЛТТАЙ ЗОХИОН БАЙГУУЛАВ
COP 17 бага хурлыг зохион байгуулах Үндэсний хорооны Ажлын алба “Конрад-Аденауэр сан”-тай хамтран “Үндэсний хэмжээнд сэтгүүлчдийг байгаль орчны чиглэлээр мэргэшүүлэх сургалт”-ын хоёр дахь шатны сургалтыг арваннэгдүгээр сарын 13-14-ий өдрүүдэд амжилттай зохион байгууллаа.
Сургалтад телевиз, радио, сонин, сайтын 40 гаруй сэтгүүлч хамрагдаж, COP17-г Монгол Улсад зохион байгуулах болсон шалтгаан, ач холбогдол болон бэлтгэл ажлын хүрээнд олон улсад танилцуулах санал санаачилга, хөтөлбөрийн агуулга, үзэл баримтлалын талаар мэдээлэл сонссон юм.
Сэтгүүлчид багт хуваагдан COP17-гийн хүрээний асуудлуудаар хэлэлцүүлэг өрнүүлж, баг бүрийн ажиллагааны дутагдалтай болон давуу талыг тодорхойлж, сайжруулалт хийх, цөлжилт, уур амьсгалын өөрчлөлтийн асуудлыг төр засаг, шийдвэр гаргагчид болон иргэд, олон нийтэд хүргэх хамгийн оновчтой аргыг тодорхойлох зэргээр олж авсан мэдлэгээ баталгаажуулах байдлаар сургалт явагдав. Байгаль орчны чиглэлээр сэтгүүлчдийг мэргэшүүлэх дараагийн сургалт ирэх онд үргэлжилнэ.
Сэтгэгдэл (0)
Сэтгэгдэл бичигдээгүй байна