ӨНӨӨДӨР АХМАДЫН ӨДӨР

Өнөөдөр Олон улсын ахмадын өдөр тохиож байна. 

Ахмад настны баярыг тэмдэглэх шийдвэрийг НҮБ-аас 1990 онд гаргасан бөгөөд манай улс 1992 оноос тэмдэглэж иржээ. Жил бүрийн аравдугаар сарын 1-ний өдөр ахмадууддаа зориулж, хүндэтгэлийн үйл ажиллагаа зохион байгуулдаг уламжлалтай.

Манай улсад 55 -аас дээш насны эмэгтэй, 60-аас дээш насны эрэгтэй нийт 406,306 хүн амьдарч байна.
Дэлхийн хүн амд 65 ба түүнээс дээш насны ахмадууд 2022 онд 10 хувийг эзэлж байсан бол 2030 онд 12 хувь, 2050 онд 16 хувь болж өсөхөөр тооцоололтой байгаа аж. Монгол улсын хувьд 2021 оны байдлаар 60 ба түүнээс дээш насныхан хүн амын 9.7 хувь, 2030 онд 11.9 хувь, 2050 он гэхэд 5 хүн тутмын нэг нь 60 ба түүнээс дээш настай болохоор мэргэжлийнхэн тооцжээ. 

Улсын хэмжээнд хамгийн өндөр настан 107 настай байна гэж Үндэсний статистикийн хорооноос мэдээлсэн байна.  

Монгол Улсын нийт хүн амын 9 хувийг ахмадууд эзэлж байгаагаас 40.2 хувь нь эрэгтэйчүүд бол 59.8 хувь нь эмэгтэйчүүд байна. 

Ахмадуудын хамгийн түгээмэл нэрс нь Оюунчимэг, Алтанцэцэг, Энхтуяа, Наранцэцэг, Оюунцэцэг байна. Аравдугаар сарын 1-ний өдөр буюу ахмадын баяраар төрсөн эрэгтэй 547, эмэгтэй 803 байгаа юм.