Намрын ногоон өдрүүд үзэсгэлэн өнөөдрөөс /2025.09.22/ Төв цэнгэлдэх хүрээлэнд гарч эхэллээ.
Үдээс хойхно очиход бороотой байсан болоод ч тэр үү, ерөнхийдөө ажил нь жигдрээгүй, дөнгөж эхлэл байддалтай байлаа. Хүнсний ногоо нь цэнгэлдэх хүрээлэнгийнхээ гадаа талбайд, харин дотор нь үндэсний үйлдвэрлэгч компаниудын бүтээгдэхүүнүүд зонхилжээ.
Ноолуур, савхин хувцас, дээл, гутал гээд бараа янз янзаараа үзэгдэнэ. Мах импекс, Очир дагинас, Өгөөж чихэр боов, Сүү ХК гээд үндэсний компанийн бүтээгдэхүүнүүд дэлгүүрийн үнээрээ зарагдаж байна.
Хөвсгөлийн жимс, чанамал, Булганы айраг, Говь-Алтайн газрын алим, Хэнтийн цагаан сармис, Өмнөговийн улаан лооль, говийнхны ингэний хоормог, Сэлэнгийн хүнсний ногоо зөгийн бал, түүнчлэн барагшун зэрэг эмийн ургамлуудаар хийсэн бүтээгдэхүүн, төрөл бүрийн ааруул хурууд өрөм цөцгий гээд манай 21 аймгийнхан гол бүтээгдэхүүнүүдээ үзэсгэлэн худалдаанд дэлгэжээ.
Үнийн хувьд төмс, байцаа 2000, манжин, лууван 2500, сонгино 3500, улаан лооль 10000-15000, огурцы 8000-10000 төгрөгийн үнэтэй байв. Ерөнхийдөө дэлгүүрийн үнээс жаахан татуу ч зарим нь бараг ижил үнэтэй юм уу даа гэж бодогдсон. Сонголт бол мэдээж дэлгүүртэй харьцуулахааргүй өргөн.
Бороотой үе таарсан учраас зарим павилон нь хүнгүй, жимстэй лангуу 6-7-гоос хэтрэхгүй байлаа. Маргаашаас жигдрээд ирэхээрээ нэмэгдэх нь тодорхой. Нэрс зэрэг жимс 1 кг нь 25 мянга орчим төгрөг бол жилийн жилд хамгийн хямд байдаг аньс харин хамгийн үнэтэй буюу 40000 төгрөгт хүрчээ. Ганцхан лангуун дээр л аньс байсан бөгөөд яагаад ийм үнэтэй болсныг лавлахад зарж буй хүн нь энэ жил аньс ховор байгаа гэв. Ханиад томуунд хэрэгтэй гэж айл бүр шахуу авч хадгалдаг энэ жимс долоо хоног үргэлжлэх үзэсгэлэн худалдааны явцад илүү олон газарт гарах байлгүй гэж бодно.
Бороо устайд таарсан учир өнөөдөр дөнгөж нээгдсэн үзэсгэлэн худалдаагаар ороод гарахад иймэрхүү.
Жил болгон 21 аймгийн сор бүтээгдэхүүнүүд дэлгэдэг үзэсгэлэн долоо хоногийн турш Цэнгэлдэх хүрээлэнд гарна.
Сэтгэгдэл (0)
Сэтгэгдэл бичигдээгүй байна