ХӨВСГӨЛД АЛГА БОЛСОН 2 НАСТАЙ ХҮҮГ ЭРЭН ХАЙХ АЖИЛЛАГАА 4 ДЭХ ӨДРӨӨ ҮРГЭЛЖИЛЖ БАЙНА

Хөвсгөл аймгийн Тариалан суманд алга болсон 2 настай хүүг эрэн хайх ажиллагаа дөрөв дэх өдрөө үргэлжилж байна. 

Эрлийн ажиллагааг 7 цагт эрэлч 10 нохойн эрлээр эхлүүлж, хүүгийн алга болсон газраас баруун урд зүгт “Сайхан модны халзан өвөр” гэдэг газраас хойд зүгт “Баянбэлчирийн даваа” хүртэл 500м өргөнтэйгөөр 2,5 км газарт 29 морьтой хүн, 314 хүн явганаар самналт хийж байна гэж эрлийн Шуурхай штабаас мэдэгджээ. 

Хөвсгөл, Орхон, Булган, Дархан-Уул аймгийн Онцгой байдлын газар, Агаараас эрэн хайх 111 дүгээр анги, Үндэсний аврах бригад, Цагдаагийн байгууллагын алба хаагчид, Хөвсгөл аймгийн Засаг даргын Тамгын газар, Хөвсгөл аймаг дахь Шүүхийн шийдвэр гүйцэтгэх газар, Зэвсэгт хүчний 321 дүгээр тусгай салбар, Хилийн цэргийн 0257 дугаар анги, Орхон аймгийн Зэвсэгт хүчний 186 дугаар анги, аймгийн Прокурорын газар, Эрдмийн далай, Титэм ЕБС, Хүүхэд, гэр бүлийн хөгжил, хамгааллын газар, Их-Уул, Тариалан, Шинэ-Идэр сумын ЗДТГ-ын, ЕБС, Тариалан болон Мөрөн сумын сайн дурын иргэд, Ар гэрийн хүмүүс, Орхон аймгийн сайн дурын иргэд, Дорнод аймгийн сайн дурын иргэд зэрэг иргэд эрлийн ажиллагаанд оролцож байна.

УИХ-ын гишүүн Х.Баттулга эрэн хайх ажиллагаа явагдаж буй Тариалан сумын Баянбэлчирийн Сайхан мод гэдэг газарт ажиллаж байгаа бөгөөд тус ажиллагаанд оролцож буй иргэдэд хүнс болон шаардлагатай зүйлсээр дэмжин ажиллана гэдгийг Хөвсгөл аймгийн Онцгой комиссын дэд дарга, Хөвсгөл аймгийн Засаг даргын орлогч Ц.Гансүхэд хэлжээ. 

Мөн эрлийн ажиллагаанд дотоодын төдийгүй гадаадын иргэд ч оролцож байгаа аж. 

Эрэн хайх ажиллагаанд Онцгой байдлын ерөнхий газрын харьяа Агаараас эрэн хайх 111 дүгээр ангийн нисдэг тэрэг 3 хоног агаараас эрэн хайх ажиллагаа явуулж байна. Мөн эрлийн ажиллагаанд 10 дрон ашиглаж байгаагаас хоёр нь дулаан мэдрэгчтэй дрон байна. Дулаан мэдрэгчтэй дроныг шөнийн ээлжид ихэвчлэн ашиглаж байгаа бөгөөд тухайлбал өнгөрсөн шөнө үүр цайтал ажилуулжээ.