ХӨВСГӨЛИЙН ЦАГААН-УУЛД ТАРВАГАН ТАХЛЫН ӨВЧЛӨЛ БҮРТГЭГДЖЭЭ

Хөвсгөл аймгийн Цагаан-Уул сумын Шарга багийн нутаг "Тагийн нуур" гэдэг газар 2025 оны 9 дүгээр сарын 3-ны өдөр тарваган тахлын хүний өвчлөлийн нэг тохиолдол бүртгэгджээ. 

Энэ газар нь аймгийн төвөөс баруун урд зүгт 152км, сумын төвөөс баруун урд зүгт 30км зайтай аж.

Аймгийн Онцгой комиссын бүрэлдэхүүн яаралтайгаар хуралдаж байна.

Тарваган тахал нь мэрэгч амьтдаас хүнд халддаг гоц аюулт халдварт өвчин юм. Тарваган тахлаар тарвага, зурам, үхэр огодой, үлийн болон гэрийн цагаан оготно, чичүүл зэрэг мэрэгчдээс гадна хүн өвчилдөг. Өвчин үүсгэгчийг мэрэгчдийн дунд бүүрэг дамжуулдаг. Өвчин үүсгэгч нь мэрэгчдийн арьсанд 23 хоног, хоол хүнсэнд 2-4 сар, өвчтний цэр, идээ, цусанд 4-165 хоног өвчин үүсгэх чадвартайгаар хадгалагддаг.

Тарваган тахал дараах замаар хүнд халдварладаг.

• • Шууд хавьтал 
• • Дам халдвар 
• • Агаар дусал 
• • Хоол хүнс 

Тарваган тахал өвчний үед  гэнэт өндөр халуурах, толгой хүчтэй өвдөх, эргэх, дотор муухайрах, бөөлжих, тайван бус болж, нойргүйдэх, арьс салстаар халдвар авсан үед булчирхай томорч хүчтэй эмзэглэх, амьсгалын замаар халдвар авсан тохиолдолд гэнэт өндөр халуурч цээжээр өвдөх, ханиалгах, цустай цэр гарах, амьсгаадах, хоол боловсруулах замаар халдвар авсан үед суулгах, заримдаа цусаар суулгах шинжүүд илэрдэг.

ХЭРХЭН УРЬДЧИЛАН СЭРГИЙЛЭХ ВЭ?

• Тарвага агнахгүй, арьсыг нь өвчихгүй байх
• Тарваганы мах, дотор эрхтнийг түүхийгээр хэрэглэхгүй байх
• Агнасан тарвага, түүний махыг хөлдөөж хадгалахгүй, тээвэрлэхгүй байх
• Тарвага, тулам худалдах болон худалдаж авахгүй байх
• Бөөс, бүүрэгт хазуулахаас сэргийлж тарваганы нүх, дош руу ойртохгүй байх
• Тарваганы үхдэл, сэг зэм, хөдөлгөөн нь удааширсан тарвагатай таарвал гар хүрэхгүй байх