ОНЦГОЙ БАЙДЛЫН АХЛАГЧ М.ДОРЖБАЯР ГОЛД ЖИВЖ БАЙСАН ХОЁР ХҮҮХДИЙГ АВАРЧЭЭ

Завхан аймгийн Онцгой байдлын газрын Тосонцэнгэл сум дахь Онцгой байдлын хэлтсийн Гал түймэр унтраах, аврах 39 дүгээр ангийн гал унтраах автомашины жолооч, ахлах ахлагч М.Доржбаяр амарч явахдаа голын усанд живж байсан хоёр хүүхдийн амь насыг авран хамгаалжээ.

Тэрбээр гэр бүлийн хамтаар амарч явахдаа зургадугаар сарын 15-ны өдрийн 20 цагийн орчимд Хожуул голд хөл алдаж живж байсан хоёр хүүхдийг аварч, ар гэрт нь эсэн мэнд хүлээлгэн өгсөн байна.

Усанд живсэн дүүгээ аврах гэж ороод ах нь хөл алдаж, хоёулаа амь эрсдэх аюултай байсныг ийнхүү анзаарч, хоёр хүүхдийг эсэн мэнд аварч, эмнэлгийн анхан шатны тусламж үзүүлсэнд гэр бүлийнх нь зүгээс талархал ирүүлжээ.