С.ЭНХБААТАР, М.АЛТАН-ОЧИР НАРЫГ ШЕЗ-ИЙН ГИШҮҮНД НЭР ДЭВШҮҮЛЖ, ХУУЛЬ ЗҮЙН БАЙНГЫН ХОРООНД ХҮРГҮҮЛЭХЭЭР ШИЙДВЭРЛЭВ

Монгол Улсын Шүүхийн тухай хууль /шинэчилсэн найруулга/-ийн 77 дугаар зүйлд Шүүхийн ерөнхий зөвлөлийн шүүгч бус гишүүнийг Улсын Их Хурал нээлттэйгээр нэр дэвшүүлж, сонгон шалгаруулсны үндсэн дээр томилгооны сонсгол хийж томилохоор заасан.

Хууль зүйн байнгын хороо 2024 оны 10 дугаар сарын 2-ны өдөр хуралдаж Шүүхийн ерөнхий зөвлөлийн шүүгч бус гишүүнд нэр дэвшигчийг 2024 оны 10 дугаар сарын 2-ны өдрөөс 2024 оны 10 дугаар сарын 23-ны өдрийн хооронд бүртгэхээр тогтсон бөгөөд нэр дэвшигчээр С.Энхбаатар, М.Алтан-Очир нар материалаа ирүүлсэн юм.

Хууль зүйн байнгын хорооны тогтоолоор Шүүхийн ерөнхий зөвлөлийн шүүгч бус гишүүний сонгон шалгаруулах үүрэг бүхий ажлын хэсгийг УИХ-ын гишүүн Ц.Сандаг-Очир ахалж, Ерөнхийлөгчийн Тамгын газрын Хуулийн бодлогын газрын дарга Ж.Мөнхболд, УИХ дахь МАН-ын бүлгийн Ажлын албаны дэд дарга О.Бат-Эрдэнэ, УИХ дахь АН-ын бүлгийн Хүний эрх, эрх зүйн бодлогын зөвлөх Х.Номингэрэл, ЗГХЭГ-ын дэд дарга Б.Батцэцэг, ХЭҮК-ын гишүүн С.Дондов, Монголын хуульчдын холбооны Зөвлөлийн гишүүн Ц.Мөнхбат, Монголын өмгөөлөгчдийн холбооны Удирдах зөвлөлийн гишүүн З.Сүхбаатар, Хууль зүйн үндэсний хүрээлэнгийн захирал Х.Эрдэм-Ундрах, МУИС-ийн Хууль зүйн сургуулийн захирал Б.Амарсанаа, Отгонтэнгэр их сургуулийн ахлах багш С.Эрдэнэболор нарын бүрэлдэхүүнтэй байгуулсан.

Хууль зүйн байнгын хорооны 2021 оны гуравдугаар сарын 10-ны өдрийн 06 дугаар тогтоолоор баталсан Шүүхийн ерөнхий зөвлөлийн болон Шүүхийн сахилгын хорооны шүүгч бус гишүүнийг сонгон шалгуулах журмын дагуу 

• сонгон шалгаруулалтын зарыг нийтэд мэдээлэх, 
• нэр дэвших тухай хүсэлт, материал хүлээн авах, 
• ажлын хэсэг байгуулах, 
• нэр дэвшигчдээ бүртгэж, нийтэд мэдээлэх, 
• нэр дэвшигчийн баримт бичгийг parliament.mn цахим хуудсанд байршуулах, 
• нэр дэвшигчийн талаар мэдээлэл цуглуулах, бүрдүүлэх, 
• ажлын хэсгийн ярилцлага зохион байгуулах, 
• нэр дэвшигчийг тодруулан УИХ-д санал болгох гэсэн 8 үе шатны хүрээнд зохион байгуулж, саналаа олон нийтэд танилцуулж байгаа аж.  

Шүүхийн ерөнхий зөвлөлийн шүүгч бус гишүүнд нэр дэвших хүсэлт, материалаа 2 хүн ирүүлснээр сонгон шалгаруулалтыг зохион байгуулав. 

Дээр дурдсан журмын 2.6-д энэ журмын 12.1-д заасан хуралдаанаас хойш ажлын гурван өдрийн дотор энэ журамд заасны дагуу олонхын санал авсан нэр дэвшигчийн талаарх ажлын хэсгийн тайлан, холбогдох баримт бичгийг Байнгын хороонд хүргүүлнэ гэж заасны дагуу Хууль зүйн байнгын хороонд хүргүүлэх зохицуулалттай.

Шүүхийн ерөнхий зөвлөлийн шүүгч бус гишүүнд ажлын хэсгийн гишүүдийн олонхын санал авсан нэр дэвшигч С.Энхбаатар, М.Алтан-Очир нарыг нэр дэвшүүлж, Хууль зүйн байнгын хороонд хүргүүлэхээр шийдвэрлэжээ.