MONGOLIA MINING олон улсын уул уурхайн үзэсгэлэн өчигдөр /2024.10.08/ нээлтээ хийсэн бөгөөд 13 дахь жилдээ зохион байгуулагдаж буй уг үзэсгэлэнд 20 гаруй улсын 300 гаруй уул уурхайн ханган нийлүүлэгч компани, хөрөнгө оруулагчид цуглараад байна.
Аж үйлдвэр, эрдэс баялгийн яамны Төрийн нарийн бичгийн дарга С.Жавхланбаатар тус үзэсгэлэнгийн нээлтэд оролцож, үг хэллээ.Тэрбээр энэ өдрүүдэд Монгол Улс уул уурхайн үзэсгэлэн, арга хэмжээгээр амьсгалж буйн онцлоод өнгөрсөн долоо хоногт "Mining Week 2024" арга хэмжээ амжилттай болж өнгөрснийг тэмдэглэсэн юм.
Мөн “MONGOLIA MINING” арга хэмжээ гадаад, дотоодын хөрөнгө оруулагчид, төсөл хэрэгжүүлэгчид, уул уурхайн ханган нийлүүлэгчид, банк санхүүгийнхний дунд хүлээгддэг арга хэмжээ болтлоо өргөжин тэлсэнд таатай буйгаа илэрхийлэв.
Монгол Улсын дотоодын нийт бүтээгдэхүүний 30 хувь, төсвийн орлогын 30 хувь, нийт экспортын 93 хувь, гадаадын шууд хөрөнгө оруулалтын 70 гаруй хувийг уул уурхайн салбар дангаар бүрдүүлж байгааг тэмдэглээд энэхүү үзүүлэлтийг өнөөг хүртэл бий болгоход тус үзэсгэлэнгийн хувь нэмэр их гэдгийг онцоллоо.
2024 оны УИХ-ын сонгуулийн үр дүнд байгуулагдсан хамтарсан Засгийн газраас уул уурхай, эрдэс баялгийн салбарт хэд хэдэн томоохон бодлогыг дэвшүүлж байгаа бөгөөд олборлох үйлдвэрлэлээс боловсруулах үйлдвэрлэл рүү чиглүүлж, уул уурхайн салбараа аж үйлдвэртэйгээ хослуулан шинэ шатанд хүргэх зорилт тавин ажиллаж байна. Энэ хүрээнд Монгол Улсын Засгийн газраас саяхан 14 мега төслийг хэрэгжүүлэхийг зорьж байгаагаа зарласан, эдгээрийн 6 нь Аж үйлдвэр, эрдэс баялгийн яамны эрхлэх асуудлын хүрээнд шууд хамаарч байгаа. Тухайлбал, зэс боловсруулах үйлдвэр, гангийн үйлдвэр, нүүрс-хими, нүүрс-коксын үйлдвэр, газрын тос боловсруулах үйлдвэр, алт цэвэршүүлэх үйлдвэрлэл технологийн паркуудыг тус тус багтаасан байгааг танилцуулав.
Түүнчлэн уул уурхайн салбарыг олон улсын жишигт нийцсэн, дэлхий нийтийн чиг хандлагад нийцүүлсэн хариуцлагатай уул уурхайн зарчимд тулгуурлан дэвшилтэт техник, технологийг нэвтрүүлж, нутагшуулах замаар хөгжүүлэх бодлого чиглэж байгаагаа дурдаад цаашид хувийн хэвшлүүдтэйгээ хамтран ажиллахад бэлэн буйгаа илэрхийлэв.
Мөн салбарынхаа ил тод байдлыг бий болгох, хууль, эрх зүйн орчныг тогтвортой байлгах хүрээнд та бүхэнтэй хамтран ажиллана гэлээ.
Сэтгэгдэл (0)
Сэтгэгдэл бичигдээгүй байна