Нийгмийн сайн сайхны төлөө зөвийг санаачилж, зөв үйл хэрэгт уриалан дууддаг хамгийн олон гишүүнтэй 20К клубын хамт олон Багануурын уурхайн үйл ажиллагаатай өнгөрсөн долоо хоногт танилцлаа. 20К клубынхэн #brandTrend аян зохион байгуулаад тодорхой хугацаа өнгөрсөн бөгөөд улс орныхоо өнцөг булан бүрийн гайхамшигт сайхан байгаль, хүн ам, ёс заншил, дотоодын үйлдвэрлэл, томоохон бүтээн байгуулалт, тулгараад байгаа бэрхшээл, шийдэх гарцад анхаарал төвлөрүүлж, олон нийтэд хүргэдэг билээ.
Багануурт амьдрал, ажил буцалж байна. Хүүхдүүд нь нүдэндээ галтай, хүмүүс нь ажил хөдөлмөртөө дуртай юм. Ирсэн зочдоо Багануурынхан уурхайтайгаа танилцуулахын зэрэгцээ өөрсдийн ажил мэргэжилтэй холбоотой гэнэтийн сюрпризтэй угтлаа.
Багануурын Онцгой байдлын хэлтэс, Цагдаагийн хэлтэс, Эмнэлэг хамтран зохион байгуулдаг сургалтын энэ удаагийнхад 20К клубын гишүүд оролцов. Тун ч сонирхолтой болсон сургалтын үеэр онцгой нөхцөл байдалд хэрхэн хүний амь аврах, анхны тусламж яаж хүргэх зэрэг олон зүйлийг сурсан юм. Тэгээд болоогүй ээ, уурхайн үйл ажиллагаатай танилцах үеэрээ нөхцөл байдлыг бодитоор ойлгосон. Энэ талаараа ч Монголын хамгийн олон дагагчтай сошиал инфлүүзрүүд өөрийн цахим хуудсаараа хэд хоног л “нүдлээ”.
Газар дээр нь очиж танилцахад нөхцөл хүнд байлаа. Багануурын уурхайн нэг шанага нүүрс 50 ч хүрэхгүй, 43 төгрөг. Уурхай хоногт 12000 тонн нүүрс олборлон станцуудад нийлүүлдэг. Гэвч нүүрсний үнэ, өртгийн зөрүүнээс нэг хоногт л 131 сая, сард 3.9 тэрбумын алдагдал хүлээдэг. Төр нүүрсний үнийг хязгаарладаг, уурхай ашиггүй ажиллаж байгааг мэдэх атлаа татвараар боомилдог. Тухайлбал, 2022 онд Татварын ерөнхий газраас 2016-2019 оны татварыг хугацаанд нь төлөөгүй гэж 10.8 тэрбум, 2020-2022 оны татварыг хугацаанд нь төлөөгүй гэж 11.8 тэрбум, нийт 22.6 тэрбум төгрөгийн алданги ногдуулжээ. Гэсэн хэдий ч Багануур ХК-ийн 1100 гаруй ажилчид нүдэндээ галтай, нүүрэндээ цогтой, ирээдүйдээ итгэлтэй, хамгийн гол нь уурхайдаа хайртай, эх орныхоо голомтыг сахих үүргээ нэр төртэй биелүүлж, үүрэг хариуцлагаа ухамсарласан бахархам хамт олон санагдсан.
Санхүүгийн хувьд алдагдалтай байгаа ч тэд үйлдвэрлэлтийн төлөвлөгөөт зорилтоо 100-аас дээш хувь биелүүлсэн байна лээ. Сэтгэлтэй зүтгэлтэй ийм хамт олныг нэг л дэмжээд өгчихвөл сэпхийгээд л босоод явчихна даа гэж өөрийн эрхгүй бодогдсон. Уг нь Багануурын уурхайн өнгө зүс, ажилчдын уйгагүй хөдөлмөр, удирдлагын арга барил, хичээл зүтгэл ер дутаагүй юм билээ. Гэвч нийслэлийг тогтой байлгахад өдөр шөнөгүй зүтгэж байгаа тус уурхай руу төр засгийн бодлогоор анхаарал хандуулах цаг болсныг энэ дашрамд дуулгая.
Д.ХҮСЛЭН
Сэтгэгдэл (0)
Сэтгэгдэл бичигдээгүй байна