АВЛИГЫН УЛМААС ХУЛГАЙЛАГДСАН 2.6 ИХ НАЯД ТӨГРӨГИЙГ ТӨЛҮҮЛСЭН

-ОЛОН УЛСАД ХУРААСАН ХӨРӨНГИЙГ АВТОЗАМ, СУРГУУЛЬ БАРИХАД АШИГЛАДАГ-

Авлигатай тэмцэх газар авлигын эсрэг үйл ажиллагааны хүрээнд хөрөнгө буцаах ажиллагааг явуулсны дүнд
• 2021 онд- 96 тэрбум төгрөг
• 2022 онд- 2.3 их наяд
• 2023 онд- 238 тэрбум төгрөгийг нөхөн төлүүлсэн.
Энэ мөнгийг Сангийн яам болон төрийн өмчит байгууллагад төвлөрүүлдэг гэж АТГ-ын урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Х.Ихмөрөн ярилаа.
Авлигын улмаас хулгайлагдсан хөрөнгийг буцаах сэдвээр НҮБ-ын төлөөлөгч нар оролцсон олон улсын бага хурал манай улсад болж байна. Олон улсын бага хурал
• Монгол Улс дахь конвенцын хэрэгжилтийн үнэлгээний хоёр үеийг харгалзан хэрэгжүүлэх явцын ахиц дэвшлийг тодорхойлох
• Оролцогч тал хооронд мэдлэг харилцан солилцох нөхцөл бололцоог бүрдүүлэх
• Авлигатай тэмцэх санаачилгыг хэрэгжүүлэхэд шаардлагатай техник туслалцааг тодорхойлох зэрэг асуудлуудыг хэлэлцэж байгаа юм.
“2023 онд урьдчилан сэргийлэх болон хөрөнгө буцаах хэрэгжилтийн тайлангаа гаргасан. НҮБ-аас өнгөрсөн оны тайланг үнэлэхэд Монгол Улс авлигын хөрөнгийг буцаан хураах туршлага сайн хэдий ч дараа нь хэрхэн ашиглах, зарцуулах тал дээр тодорхой шийдэлгүй байна. Аль ч улсад хээл, хахуулаар олж авсан хөрөнгийг буцаах буюу хураасны дараагаар энэхүү хөрөнгийг яах вэ гэдэг асуулттай тулгардаг. Олон улсад хураасан хөрөнгийг сургууль, авто зам барихад ашигладаг. Мөн авлигын хэргийг мөрдөхөд маш их хүч, хөдөлмөр, цаг хугацаа, хөрөнгө шаардагдаг учраас зарим улс холбогдох төрийн байгууллагуудад зарцуулж байна. Мөн шүгэл үлээгч нарыг хамгаалах тусгай санд хадгалдаг туршлага бий.Гурван өдрийн турш үргэлжлэх уг хурлаар бид зөвлөмж гаргах болно. Авлигын эсрэг НҮБ-ын конвенцод нэгдсэн улс орнууд нэг зорилгын төлөө нэгддэг ч хөгжил дэвшил, нөхцөл байдлаас шалтгаалж авлигын түвшин өөр өөр байдаг” гэж Зүүн Өмнөд Ази, Номхон далайн нутгийн Авлигатай тэмцэх багийн ахлагч Анника Витес ярьжээ.