Монголын тариаланчдын үндэсний холбооны ээлжит чуулганаас УИХ-ын гишүүн асан Сундуйн Батболдыг тус холбооны тэргүүнээр сонгожээ.
Чуулганд 21 аймгийн 400 гаруй тариаланч оролцсон бөгөөд "Эвийг эрхэмлэн амжилтыг бүтээе" уриан дор өчигдөр /2025.01.25/ болсон юм.
Монголын тариаланчдын үндэсний холбооны тэргүүнд Су.Батболдтой тус холбооны тэргүүний үүргийг түр орлон гүйцэтгэгч, тариаланч З.Чулуунцэцэг, "Момо агро" ХХК-ийн захирал Б.Батбаяр, "Буянт төв" ХХК-ийн захирал Ж.Саруул, "Сансаргоо" ХХК-ийн захирал Б.Амарсанаа нар өрсөлдсөн байна.
Су.Батболд Хөдөө аж ахуйн дээд сургуулийг инженер-багш мэргэжлээр, Төрийн захиргаа, удирдлагын хөгжлийн институтийг удирдлагын арга зүйч, зохион байгуулагч, менежер мэргэжлээр, МУИС-ийг эрх зүйч мэргэжлээр тус тус төгссөн.
Төв аймгийн Нэгдлийн холбооны зөвлөлд ерөнхий инженерээр ажлын гараагаа эхэлж, тус аймгийн Хүнс, хөдөө аж ахуй, байгаль орчны хэлтэст eрөнхий инженер, хэлтсийн дарга, аймгийн Засаг даргын Тамгын газарт хэлтсийн дарга, Иргэдийн төлөөлөгчдийн хурлын Тэргүүлэгчдийн дарга хийж байсан. 2002-2016 онд УИХ-ын гишүүнээр сонгогдож, Улсын Их Хурлын Төрийн байгуулалтын байнгын хорооны дарга, Хууль зүй, дотоод хэргийн сайд, ЗГХЭГ-ын дарга, Улсын Их Хурлын Байгаль орчин, хүнс, хөдөө аж ахуйн байнгын хорооны даргаар ажиллаж байсан. Нийслэлийн Засаг дарга бөгөөд Улаанбаатар хотын захирагчаар 2016-2018 онд ажилласан түүхтэй.
Сэтгэгдэл (0)
Сэтгэгдэл бичигдээгүй байна