Хотуудын дуу чимээний бохирдол улам бүр нэмэгдсээр байгаа нь хүний эрүүл мэнд төдийгүй байгаль орчныг, амьтан, ургамал, жигүүртэн, хорхой шавж гээд биологийн бүхий л төрөл зүйлүүдэд сөргөөр нөлөөлөх болжээ. Мэргэжилтнүүд авто техник, үйлдвэр, станц зэргийн дуу чимээ амьтдын хоол хүнсээ олох болон үржилд ороход нь саад болдгийг тогтоожээ. Нийт дуу чимээний 80 хувь нь авто тээврийн хэрэгслээс гардаг бөгөөд 1980 оноос хойш 3 дахин нэмэгдсэн байна.
Дуу чимээ бохирдлоос хамгаалах арга хэмжээнүүдээс хамгийн бодитой, үр дүнтэйг нь ажиллаж, амьдардаг орчиндоо мод тарихыг мэргэжилтнүүд зөвлөж байна. Учир нь ой мод дуу чимээний бүр 25 хувийг өөртөө шингээн сааруулдаг болохыг тогтоожээ. Мод нь дуу чимээний бохирдлыг бууруулаад зогсохгүй орчны агаарыг цэвэршүүлж, чийг хураан, амар амгалан, нам гүм мэдрэмж төрүүлдэг шидтэн.
Хэт чанга болон үргэлжийн их дуу чимээтэй газар удсан хүний биед олон сөрөг өөрчлөлт ажиглагддаг байна. Богино хугацаанд илрэхгүй ч аажмаар хүнийг эрүүл биеийг бохирдуулж хордуулдаг гэсэн үг. Их дуу чимээ юуны түрүүнд сэтгэцэд нөлөөлдөг. Байнгын дуу чимээтэй орчинд ажиллаж, хотын төвд амьдардаг хүмүүс нам гүм орчинд байдаг хүмүүстэй харьцуулахад илүү уур уцаартай, аймхай, өөртөө итгэлгүй, гутранги болдог нь судалгаагаар тогтоогдсон байна.
Байгалийн цогцолбор газар болон дархан цаазат бүсэд нутагладаг амьтад хүртэл дуу чимээний бохирдлын нөлөөнд автах болжээ. Тухайлбал, Канадын хот суурин газрын дуу чимээнээс болж нутгийн нэгэн зүйлийн мэлхийний тоо толгой буурсныг тогтоолоо. Африкт авто замаас 30 метр ба түүнээс бага зайд нутагладаг бич, сармагчны тоо толгой сүүлийн 15 жилд 45 хүртэлх хувиар буурсан байна. Харин Нидерландын ойн шувууны 60 орчим хувь дуу чимээнээс дайждаг нь тогтоогджээ. Монголд одоогоор дуу чимээний бохирдлын нөлөөллийн нарийвчилсан судалгаа хийгдээгүй байна.
#COP17 Зохион байгуулах Үндэсний хороо
Сэтгэгдэл (0)
Сэтгэгдэл бичигдээгүй байна