Модод бол ямар ч эртний номын сангаас дутуугүй ихийг хүүрнэх чадалтай амьд гэрчүүд юм. Монгол орны ойн сангийн багагүй хэсгийг эзлэх шилмүүст моддын цагариг маш тодорхой байдаг. Судлаачдын баталснаар, Монголын хамгийн өндөр буюу 880 настай мод Увс аймгийн Түргэн сумын нутаг, Овоот гэдэг газарт бий. Асралт хайрхан, Хөвсгөлийн тайгад ч 700-800 настай мод тохиолддог.
Манай дендрохрологичид-ойн хэлмэрчид Сибирь хуш Хоргын тогооны галт уулын хайлмагтай газарт хатуурч үлдсэн хэсгээс дээж авч боловсруулалт хийжээ. Үүний дүнд энэхүү хуш мод нь Монгол оронд өмнө нь хийгдэж байсан уур амьсгалын өөрчлөлтийн судалгаанд ашигласан модны цагаригийн дээжүүдээс гарган авсан өсөлтийн хронологийг 1000 жилээр урагш уртасгасан гайхамшигт тооцогдлоо.
Учир нь, 1211-1225 оны хооронд буюу Эзэн Чингис хааны төр барьж байх үед хур тунадас хангалттай их байсныг хуш модны жилийн цагаригийн өсөлтөөр бататгасан нээлт түүхэнд бичигдсэн. Нэг үгээр хэлбэл, мод бол амьд гэрч. Хүн түүнд ямар хор учруулж, ямар гай тарьж, бүр хэдэн насанд нь гэмтээсэн, хэд дэх жилээс нь харангадуулсныг гээд бүгдийг нотлох баримтаа жил бүр хадгалдаг, өөртөө тамгалан үлдээдэг гэрчүүд юм.
Сэтгэгдэл (0)
Сэтгэгдэл бичигдээгүй байна