Монгол орны Төв Азийн гадагшаа урсгалгүй ай савын томоохон голуудын нэг бол Онги. Хангайн нурууны өврөөс эх аван ойт хээр, хээр, говийн бүсийг дамжин 437 км зам туулан өртөөлсөөр, 175 хавтгай дөрвөлжин талбайг хамарсан Улаан нуурыг бий болгодог буянтай гол. Онгийн цутгал голууд хүний хүчин зүйл болон уур амьсгалын өөрчлөлтийн нөлөөгөөр сүүлийн жилүүдэд байнга тасарч, урсац нь улам бүр хумигдан дундарсаар байгаа билээ. Тэгвэл говийн бүсийн экосистемийн тэнцвэрт байдлыг хадгалахад онцгой үүрэг гүйцэтгэдэг Онги голыг хамгаалах ажил бодитоор хэрэгжихээр болжээ.
УИХ-ын чуулганаар Онги-Цагаанбургастайн дэд төслийг хэрэгжүүлэхээр баталсан байна. Мега төслийн нийт өртөг нь 44 тэрбум төгрөг бөгөөд үүнээс 2026 онд төслийн ТЭЗҮ боловсруулахад 9 тэрбум төгрөгийн хөрөнгө оруулалт хийхийг дэмжсэн байна.
УИХ-ын гишүүн, Цөлжилттэй тэмцэх тухай НҮБ-ын Талуудын 17 дугаар бага хурлын (COP17) Тусгай элч Л.Мөнхбаясгалан: “Орхон-Онги, Хэрлэн-Тооно гэсэн усны хоёр мега төсөл бий. Үүний Орхон-Онги төслийн Онги-Цагаанбургастайн дэд төсөл батлагдаж, Байгаль орчин, уур амьсгалын өөрчлөлтийн сайдын багцад шилжүүлэхээр боллоо. Байгаль орчныхон төдийгүй монголчуудын хүсэн хүлээж байсан энэ төслийг эхлүүлэхээр болсон нь усны салбарын түүхэнд байгаагүй хөрөнгө оруулалт болж байгаа юм. Товчхондоо, Онги голын урсацыг нэмэгдүүлэх замаар байгуулах хоёр усан сангийн байгууламж нь Дундговийн Онгийн хийдээр дамжаад Өмнөговийн Мандал-Овоо хүрэх төсөл юм” гэв.
#COP17 Зохион байгуулах Үндэсний хороо
Сэтгэгдэл (0)
Сэтгэгдэл бичигдээгүй байна