“Аз жаргалтай Улаанбаатар” хотын нэгэн ээж “Ядаж хичээл сургууль эхлэх үеэр халуун усаа өгчихөөд 9-р сард хааж болдоггүй юм уу” гэж бухимджээ. Аргаа ядсан энэ үгийг хэлсэн хүн нь Сонгинохайрхан дүүргийн 20 дугаар хорооны оршин суугч.
Бид бүгдийн баяр есдүгээр сарын 1-ний урдах өдөр хэн нэгний шоглож хэлснээр “Үндэсний усанд орох өдөр”. Контороос лавлахад наймдугаар сарын 31-н гэхэд өгчихнө гэсэн халуун ус Сонгинохайрхан дүүргийн 20 дугаар хорооны зарим байруудад өнөөдрийг /2025.09.02/ хүртэл ирээгүй л байна. Оршин суугчид хичээлийн шинэ жилдээ догдолсон бяцхануудаа ус халаан үс толгойг нь угаасан ч сэтгэл дундуур, бухимдалтай. Сэтгэл дундуураас гадна гурван сарын турш тасарсан халуун ус есдүгээр сарын 15-нд халаалт өгөхөд ч ирэхгүй байх вий гэсэн айдастай ч байна, зарим нь.
Тавдугаар сарын 26-нд тус хороонд орших байруудын халуун усыг тасалжээ. Гэхдээ оршин суугчдад урьдчилан мэдэгдсэнгүй. Зунаар халуун усаа таслуулж сурсан учир ээлжит хязгаарлалт юм байлгүй гэж ихэнх нь бодож. Контороосоо асууж сураглаад тоймтой хариу мэдээгүй хүн ч олон.
Харин дараа нь дулааны шугам өргөтгөх ажлыг тавдугаар сарын 26-наас наймдугаар сарын 18-н хүртэл хийж байгаа гэж. Гэхдээ хил гаальтай холбоотойгоор суурилагдах тоног төхөөрөмж нь 5-7 хоногоор саатаад наймдугаар сарын 30-н хүртэл халуун ус өгч чадахгүй гэсэн мэдэгдэх хуудсыг олж харжээ. Зуны халуунд гурван сарын турш тэсэцгээсэн улс за яамай, ямар ч байсан хичээлийн шинэ жилийн өмнө халуун устай золгох нь гэсэн ч худлаа болж таарав.
Шугам нь бэлэн болсон ч усны даралт нь унаад байна гэх мэтээр контороос хэлэх хариулт өдөр бүр өөр болж байгаа гэнэ.
1111 рүү долоо хоног тасралтгүй залгаад та яасан их ярьдаг юм бэ гэсэн хариулт сонссон хүн ч байна. Уг нь иргэдээсээ залхах биш, гомдол саналыг нь авах л ёстой утас биз дээ.
Энхрий хайрт хүүхдүүд гэж ярьдаг, элдэв захидал бичдэг дарга нар минь ядаж есдүгээр сарын 1-нд хүүхдээ усанд оруулах боломжийг бий болгочихоод аз жаргалтай хотын тухай яримаар байна. Есдүгээр сарын 15-нд байрнуудын халаалт ирнэ. Энэ маягаараа зуны гурван сарын турш тэссэн Сонгинохайрхан дүүргийн 20 дугаар хорооны зарим байрны оршин суугчид өвлийг хэрхэн давах юм бол гэж айж байгаагаа нуухгүй байна. Бүхэл бүтэн гурван сар гэдэг бас арай л уу?!
Сэтгэгдэл (1)