Хүний эрхийн Үндэсний Комиссоос зохион байгуулж буй “Хүүхэд бүр ялагч-Хүүхэд бүр хамгаалагч” уриатай марафонд 6-17 насны 8000 гаруй хүүхэд бүртгүүлсэн бөгөөд Үндэсний цэцэрлэгт хүрээлэнгийн “Цагдаа” талбайд долоон насны ангиллаар гүйх юм.
Тус марафоныг 2024 оноос зохион байгуулж эхэлсэн бөгөөд үе тэнгийн дээрэлхэлт, ялгаварлан гадуурхалтыг таслан зогсоох, түүний хор уршиг, сөрөг үр дагаврыг таниулах, хүүхдийн эрхийн зөрчлөөс урьдчилан сэргийлэх ойлголт, мэдлэг олгодгоороо ач холбогдолтой.
ХЭҮК-ын дарга Д.Сүнжид нээж хэлсэн үгэндээ “Хүүхдийн марафон” бол зөвхөн биеийн хөдөлгөөн, гүйлт төдийхэн биш. Энэ бол эв нэгдэл, энэрэнгүй сэтгэл, бусдын ялгаатай байдлыг хүлээн зөвшөөрөх, дээрэлхэлтгүй орчны төлөөх тэмцлийн бэлгэдэл юм. Өнгөрсөн жилийн марафонд 600 орчим хүүхэд оролцож байсан бол энэ удаа 8200 хүүхэд бүртгүүлж, бүртгүүлж амжаагүй ч оролцох хүсэлтээ илэрхийлсээр байгааг бахархууштай” гэв.
Мөн хүүхэд багачуудад хандан томчууд бидний үүрэг бол хүүхдийн дуу хоолойг сонсож, аюулгүй байдлыг хамгаалах орчныг нь бүрдүүлэх юм. Харин та бүхний оролцоо бодит дэмжлэг болж, шинэ хандлагыг эхлүүлж байгаа том алхам юм гэдгийг онцлон баяр хүргэж хамтдаа дээрэлхэлтгүй, ойлголцолтой, хүнлэг нийгмийг бүтээхийг уриалж амжилт хүслээ.
Арга хэмжээнд хүрэлцэн ирсэн хүүхэд бүр
• Барианд орж буй түүхэн мөчөө мэргэжлийн гэрэл зурагчны дуранд мөнхөлж
• Мэргэжлийн нүүр хувиргагчаар нүүрээ будуулан
• Үлгэр, киноны баатруудтай гэрэл зураг авхуулж
• Өөрийн хүсэл, мөрөөдлөө “Хүслийн хайрцаг”-т шивнэн
• Авьяаслаг хүүхдүүдийн урлагийн тоглолт, хүний эрхийн интерактив контент үзэж сонирхохоос гадна
• The Open Mic арга хэмжээнд оролцох боломжтой юм.
Сэтгэгдэл (0)
Сэтгэгдэл бичигдээгүй байна