“Түмэн тэмээний баяр– 2025” олон улсын аялал жуулчлалын арга хэмжээ Өмнөговь аймгийн Даланзадгад суманд 2025 оны хоёрдугаар сарын 1-3-ны өдрүүдэд болж байна.
Тус тэмцээний хурдан торомны уралдаанд газар газрын 54 тором уралдсанаас Баянхонгор аймгийн Баянлиг сумын аймгийн Алдарт уяач С.Өлзийн ягаан тором түрүүлжээ. Аман хүзүүнд Баянхонгор аймгийн Баянлиг сумын ААУ М.Түвшинжаргалын шар тором шалгарч, шагналт байруудад Өмнөговь аймгийн Цогт-Овоо сумын САУ Т.Хосбаатарын улаан тором, Гурвантэс сумын ААУ Б.Цолмонгийн ягаан тором,Баянхонгор аймгийн Баянлиг сумын ААУ Ц.Эрдэнэчимэгийн хар тором орсон байна.
Тэмээний соёл уламжлалыг сэргээх, энэ чиглэлийн аялал жуулчлалыг хөгжүүлэх зорилго бүхий Түмэн тэмээний баяр 1997 оноос эхлэн уламжлан болон зохиогдож байгаа бөгөөд 2016 онд Гиннесийн амжилтад бичигдэж байсан түүхтэй.
Түмэн тэмээний баярын үеэр тэмээн поло, уламжлалт тэмцээнүүдээс гадна энэ жил Мөсөн сурын харвааны тэмцээнээр төрлөө нэмж, эх орны өнцөг булан бүрээс онч мэргэн харваачид ирж цэц мэргэнээ сорин өрсөлдсөн юм.
Түүнчлэн уг арга хэмжээний нэгэн чухал хэсэг болох “Ингэний айрагны баяр-Өмнөговьд үйлдвэрлэв” үзэсгэлэн худалдаа, уран зургийн үзэсгэлэнэ, Тэмээтэй холбоотой бүтээлийн үзэсгэлэн, эрдэмтэд судлаачдын хэлэлцүүлэг, Сонгодог урлагийн тоглолт зэрэг олон арга хэмжээ зохион байгуулагдаж байна.
Мөн цахим орчинд олон сая дагагчтай гадаадын контент бүтээгчид ч тус арга хэмжээг зорин ирсэн нь ирэх жилүүдэд “Түмэн тэмээний баяр”-ыг сонирхон зорьж ирэх гадаадын жуулчдын тоог нэмэгдүүлэх хандлагатай гэж үзэж байгаа аж.
Сэтгэгдэл (0)
Сэтгэгдэл бичигдээгүй байна