ТҮМЭН ТЭМЭЭНИЙ БАЯР ӨМНӨГОВЬ АЙМАГТ БОЛЖ БАЙНА

“Түмэн тэмээний баяр– 2025” олон улсын аялал жуулчлалын арга хэмжээ Өмнөговь аймгийн Даланзадгад суманд 2025 оны хоёрдугаар сарын 1-3-ны өдрүүдэд болж байна.  

Тэмээний соёл уламжлалыг сэргээх, энэ чиглэлийн аялал жуулчлалыг хөгжүүлэх зорилго бүхий Түмэн тэмээний баяр 1997 оноос эхлэн уламжлан болон зохиогдож байгаа бөгөөд 2016 онд Гиннесийн амжилтад бичигдэж байсан түүхтэй. 

Түмэн тэмээний баярын үеэр зохион байгуулдаг гол тэмцээний нэг бол тэмээн поло юм. Тэмцээнд оролцох баг  5 хүний бүрэлдэхүүнтэй байх бөгөөд талбайд 4 тамирчин тоглож, үлдсэн нэг нь хаалгачаар зогсдог.Тэмээн поло тэмцээний талбай 80×60 метрийн хэмжээтэй, хаалга нь 2.50 метр өндөр, 6 метрийн өргөнтэй байдаг.Тамирчид 20-30 диаметртэй бөмбөгөөр хоёр талдаа эргэж тоглодог бөгөөд нэг талдаа 8 минут тоглодог ба оноо тэнцвэл нэг бөмбөг цохиж түрүүлж хаалганд орсон нь хожих дүрэмтэй.Өмнөх жилийн тэмээн поло тэмцээнд хоёр аймгийн зургаан сумын найман баг оролцож байжээ. Анх 2002 онд анх Өмнөговь аймгийн Манлай суманд зохион байгуулагдаж байсан тэмээн поло тэмцээн өргөжин хөгжсөөр эдүгээ үндэсний спорт болон хөгжиж байна.Тэмээн поло тэмцээн  түмэн тэмээний баярт ирсэн гадаад жуулчдын хамгийн их үзэх дуртай тэмцээн юм.

Монгол өв соёлыг агуулсан олон тэмцээн, уралдаан зохион байгуулагддаг уг арга хэмжээ энэ жил Мөсөн сурын харвааны тэмцээнээр төрлөө нэмж,  эх орны өнцөг булан бүрээс онч мэргэн харваачид ирж цэц мэргэнээ сорин өрсөлдөж байна. Өнөөдөр /2024.02.02/  “Саранбай харваа”-ны эмэгтэй төрөл, мөн “Тэмээтэй харваа”-ны тэмцээн анх удаа болох юм.

Түүнчлэн уг арга хэмжээний нэгэн чухал хэсэг болох “Ингэний айрагны баяр-Өмнөговьд үйлдвэрлэв” үзэсгэлэн худалдаанд тэмээний сүү, ноос, түүхий эдээр хийсэн төрөл бүрийн бараа бүтээгдэхүүнээс гадна гар урлал, бэлэг дурсгалын бүтээгдэхүүнүүдийг дэлгэн худалдан борлуулж байгаа аж.

Өмнөговь аймгийн уугуул Монголын урчуудын эвлэлийн гишүүн, СТА зураач Ө.Эрдэнэбулганы бие даасан “Флоренцийн дэг сургууль” үзэсгэлэгээ “Түмэн тэмээний баяр-2025” арга хэмжээний хүрээнд нээсэн нь баярыг зорин очсон хүмүүсийн анхаарлыг татаж байна. Ө.Эрдэнэбулган нь Итали улсын Флоренцийн урлагийн Академийг сурч төгссөн цор ганц Монгол зураач бөгөөд түүний бүтээл дэлхийн 1000 гаруй хөрөг зураач оролцсон уралдаанд шилдэг 20 бүтээлийн нэгээр шалгарч байжээ.