ИПОТЕКИЙН ДААТГАЛЫН ҮЙЛ АЖИЛЛАГАА ОЛОН УЛСЫН ЖИШИГТ НИЙЦНЭ

Санхүүгийн зохицуулах хорооны өнөөдрийн /2024.11.15/ ээлжит хуралдаанаас Уул уурхайн бүтээгдэхүүний биржийн үйл ажиллагаатай холбоотой багц журмыг шинэчлэн баталжээ. 

Хуралдаанаас мөн хоёр компанид хөрөнгө оруулалтын менежментийн үйл ажиллагаа эрхлэх, нэг компанид уул уурхайн бүтээгдэхүүний биржийн арилжааны зуучлагч (брокер)-ийн үйл ажиллагаа эрхлэх тусгай зөвшөөрлийг тус тус олгож, нэг хувийн хөрөнгө оруулалтын санг үүсгэн байгуулах баримт бичгийг бүртгэхийг зөвшөөрсөн байна.

Даатгалын үйл ажиллагааг зохицуулж байсан хэд хэдэн журам, зохицуулалтыг “Даатгалын багц дүрэм”-д нэгтгэж,  даатгагч болон даатгалын мэргэжлийн оролцогчийн үйл ажиллагааны үндсэн зохицуулалтуудыг тусгасан “Даатгалын багц дүрэм”-ийг нийт 21 хавсралттайгаар шинэчлэн баталжээ.

Ингэхдээ “Даатгагч болон даатгалын мэргэжлийн оролцогчид тавигдах шаардлага, дагаж мөрдөх үзүүлэлт”-д нийгэм эдийн засаг, хөгжлийн бодлого, олон улсын чиг хандлагатай уялдуулан цахим болон аливаа дэвшилтэт технологи ашиглахтай холбогдох зохицуулалт, даатгалын хураамжийн орлогын шимтгэлийн хувь хэмжээг нээлттэй, ил тод болгох, ТУЗ-өөс түүний хэмжээг тогтоож, хяналт тавьдаг байх, даатгалын компани даатгалын орлогын шимтгэлийн хувь хэмжээг өөрийн цахим хуудсанд нээлттэй байршуулдаг байх зэрэг зохицуулалтыг тусгасан байна. 

Түүнчлэн Ипотекийн даатгалын үйл ажиллагаанд тавигдах шаардлага, холбогдох зохицуулалтыг шинэчлэн тусгажээ. Энэхүү шинэчлэлээр ипотекийн зээлдэгчийн амь насны даатгалыг зөвхөн урт хугацааны даатгагч хийж гүйцэтгэх буюу даатгуулагч аливаа шалтгааны улмаас амь насаа алдах эрсдэлээс хамгаалагдах болсноор даатгалын хамгаалалтын хэмжээ ердийн даатгалын компанийн санал болгож байсан хамгаалалтаас 9.6 дахин их болж байна. Ингэснээр ипотекийн даатгалын үйл ажиллагаа олон улсын жишгийн дагуу даатгуулагчдын хэрэгцээ шаардлагад зохих түвшинд нийцсэн байдлаар хэрэгжих, даатгалын гэрээний сунгалтын асуудал шийдвэрлэгдсэнээр даатгалын хамрагдалт нэмэгдэх, ипотекийн даатгалын нэгдсэн мэдээллийн сан бүрдэх зэрэг ач холбогдолтой.

Хуралдаанаар мөн хоёр компанийн даатгагчийн хувьцаа эзэмшигчдийн бүтэц, бүрэлдэхүүн болон хувь нийлүүлсэн хөрөнгийн хэмжээнд өөрчлөлт оруулахыг зөвшөөрч, банк бус санхүүгийн богино хугацаат санхүүгийн хэрэгсэлд хөрөнгө оруулалт хийх энгийн зөвшөөрлийг хоёр компанид нэмж олгохоор, банк бус санхүүгийн зээл олгох үйл ажиллагаа эрхлэх тусгай зөвшөөрлийг нэг компанид олгохоор тус тус шийдвэрлэсэн юм.